Yin Addu'a domin Dukan Mutane

Bulus ya roƙa da farko a yi addu'a domin kowa, har da sarakuna, da yake Ubanmu yana so dukan mutane su sami ceto, matsakanci ɗaya kuma, Almasihu Yesu, ya ba da kansa domin dukan mutane. Sa'an nan maza su yi addu'a ba tare da fushi ba, mata kuma su yi ado da kamun kai, su koya cikin natsuwa, kada kuma su koyar.

Babi na 2.

Da farko dai, ina gargaɗi a yi roƙe-roƙe, da addu'o'i, da addu'o'in ceto, da godiya saboda dukan mutane, saboda sarakuna da dukan masu mulki, domin mu yi zaman salama da natsuwa cikin cikakkiyar ibada da mutunci. Wannan abu ne mai kyau, mai kuma faranta wa Ubanmu rai, Mai Cetonmu, wanda yake so a ceci dukan mutane, su kuma zo ga sanin gaskiya. Gama akwai Uba ɗaya, akwai kuma matsakanci ɗaya tsakanin Uba da mutane, wato mutum, Almasihu Yesu, wanda ya ba da kansa fansa saboda kowa — wato shaidar da aka bayar a daidai lokacinta. Saboda haka ne aka naɗa ni mai wa'azi da manzo — gaskiya nake faɗa, ba ƙarya nake yi ba — malamin al'ummai cikin bangaskiya da gaskiya. Ina so maza su yi addu'a a kowane wuri, suna ɗaga hannuwa masu tsarki, babu fushi ko gardama.

Haka kuma, mata su yi ado yadda ya dace, da kunya da kamun kai, ba da kitso ba, ko zinariya, ko lu'ulu'u, ko tufafi masu tsada, sai dai da ayyuka nagari, yadda ya dace da matan da suke da'awar bautar Ubanmu. Mace ta yi koyo da natsuwa, cikin cikakkiyar biyayya. Ban yarda mace ta yi koyarwa ko ta yi mulki a kan namiji ba; sai dai ta zauna shiru. Gama Adamu ne aka fara halitta, sa'an nan Hauwa'u. Ba Adamu aka ruɗe ba, amma an ruɗi macen, ta kuma zama mai keta doka. Amma za a cece ta ta wurin haihuwa, in sun ci gaba cikin bangaskiya, da ƙauna, da tsarki, tare da kamun kai. ^a