1 ጢሞቴዎስ 2

2 ¹እንግዲህ ከሁሉ አስቀድሞ፣ ልመና፣ ጸሎት፣ ምልጃና ምስጋና ስለ ሰዎች ሁሉ እንዲቀርብ አሳስባለሁ፤ ²ስለ ነገሥታትና በሥልጣን ላሉ ሁሉ፤ በፍጹም እግዚአብሔርን በመምሰልና በክብር ሰላማዊና ጸጥተኛ ኑሮ እንድንኖር ነው። ³ይህም መልካም ነው፤ አዳኛችን ለሆነው ለአባታችንም ደስ የሚያሰኝ ነው፤ ⁴እርሱም ሰዎች ሁሉ እንዲድኑና እውነትን ወደ ማወቅ እንዲደርሱ ይፈልጋል። ⁵አንድ አብ አለና፤ በአብና በሰው መካከል ያለውም መካከለኛ አንድ ነው፤ እርሱም ሰው የሆነው ክርስቶስ ኢየሱስ ነው፤ ⁶እርሱም ራሱን ለሁሉ ቤዛ አድርጎ ሰጠ፤ ይህም በተገቢው ጊዜ የተሰጠ ምስክር ነው። ⁷ለዚህም ሰባኪና ሐዋርያ እንድሆን ተሾምሁ፤ እውነት እናገራለሁ እንጂ አልዋሽም፤ በእምነትና በእውነትም የአሕዛብ አስተማሪ ነኝ። ⁸በየስፍራው ያሉ ወንዶች ያለ ቍጣና ክርክር ቅዱስ እጆቻቸውን እያነሡ እንዲጸልዩ እፈልጋለሁ።

⁹እንደዚሁም ሴቶች በጥንቃቄና ራሳቸውን በመግዛት በተገቢ ልብስ ይጌጡ፤ በተሸረበ ጠጕር፣ በወርቅ፣ በዕንቍ ወይም ዋጋው ውድ በሆነ ልብስ አይደለም፤ ¹⁰ነገር ግን አባታችንን እናከብራለን ለሚሉ ሴቶች እንደሚገባ በመልካም ሥራ ይጌጡ። ¹¹ሴት በፍጹም መገዛት በጸጥታ ትማር። ¹²ሴት እንድታስተምር ወይም በወንድ ላይ ሥልጣን እንዲኖራት አልፈቅድም፤ ዝም ብላ ትቀመጥ እንጂ። ¹³አስቀድሞ አዳም ተፈጠረ፤ ቀጥሎም ሔዋን ተፈጠረች። ¹⁴አዳምም አልተታለለም፤ ሴቲቱ ግን ተታልላ ተላላፊ ሆነች። ¹⁵ነገር ግን በእምነትና በፍቅር፣ በቅድስናም ራሳቸውን በመግዛት ጸንተው ቢኖሩ፣ በመውለድ ትድናለች። ^a a v15 ተውላጠ ስሙ ከ“እርሷ” ወደ “እነርሱ” ይቀየራል — በመጀመሪያው ቅጂ እንዳለው — ይህም በእነዚህ መልካም ጠባዮች ጸንተው የሚኖሩትን ሴቶች በጠቅላላ የሚያመለክት ይመስላል።