1 ጢሞቴዎስ 1

1 ¹በአዳኛችን በአባታችንና በተስፋችን በክርስቶስ ኢየሱስ ትእዛዝ የክርስቶስ ኢየሱስ ሐዋርያ የሆነ ጳውሎስ፣ ²በእምነት እውነተኛ ልጄ ለሆነው ለጢሞቴዎስ፤ ከአባታችንና ከጌታችን ከክርስቶስ ኢየሱስ ጸጋ፣ ምሕረትና ሰላም ይሁን።

የአብን ቤተ ሰብ ጠብቅ

³ወደ መቄዶንያ ስሄድ እንደ ለመንሁህ፣ አንዳንዶች የተለየ ትምህርት እንዳያስተምሩ ልትመክራቸው በኤፌሶን ቈይ፤ ⁴ለተረትና መጨረሻ ለሌለው የትውልድ ሐረግም ራሳቸውን እንዳይሰጡ ምከራቸው፤ እነዚህ በእምነት ከሚገኘው ከአባታችን መጋቢነት ይልቅ ክርክርን ያስነሣሉና። ⁵የዚህ ትእዛዝ ግብ ከንጹሕ ልብ፣ ከበጎ ሕሊናና ከቅን እምነት የሚመነጭ ፍቅር ነው። ⁶አንዳንዶች ከእነዚህ ስተው ወደ ከንቱ ንግግር ዘወር ብለዋል፤ ⁷የሚናገሩትን ወይም አጥብቀው የሚያረጋግጡትን ሳያስተውሉ፣ የሕግ አስተማሪዎች ሊሆኑ ይፈልጋሉ።

⁸ሕግ በአግባቡ ቢሠራበት መልካም እንደ ሆነ አሁን እናውቃለን፤ ⁹ይህንም እናውቃለን፤ ሕግ የተሠራው ለጻድቅ ሳይሆን፣ ለዐላውያንና ለዐመፀኞች፣ ለክፉዎችና ለኀጢአተኞች፣ ለርኩሳንና እግዚአብሔርን ለማያከብሩ፣ አባቶቻቸውንና እናቶቻቸውን ለሚመቱ፣ ለነፍሰ ገዳዮች፣ ¹⁰ለሴሰኞች፣ ከወንድ ጋራ ለሚተኙ ወንዶች፣ ሰውን ለሚሸጡ ነጋዴዎች፣ ለውሸታሞች፣ በሐሰት ለሚምሉ፣ እንዲሁም ጤናማውን ትምህርት ለሚቃወም ለማናቸውም ነገር ነው፤ ¹¹ይህም አደራ የተሰጠኝ፣ ከቡሩኩ አባታችን የተገኘው የክብር ወንጌል እንደሚለው ነው።

የአብ ምሕረት እጅግ ለከፋው ኀጢአተኛ ደረሰ

¹²ለአገልግሎቱ ስለ ሾመኝ ታማኝ አድርጎ ስለ ቈጠረኝ፣ ኀይልን ለሰጠኝ ለጌታችን ለክርስቶስ ኢየሱስ አመሰግናለሁ። ¹³ቀድሞ እግዚአብሔርን ተሳድቤ ነበር፤ ሌሎችንም አሳድጄ ጨካኝም ነበርሁ፤ ነገር ግን ባለማወቅና በእምነት ጕድለት ስላደረግሁት ምሕረትን አገኘሁ። ¹⁴የጌታችንም ጸጋ በክርስቶስ ኢየሱስ ካለው እምነትና ፍቅር ጋራ ለእኔ አትረፈረፈ። ¹⁵ይህ ቃል የታመነና ሙሉ በሙሉ ሊቀበሉት የሚገባ ነው፤ ክርስቶስ ኢየሱስ ኀጢአተኞችን ለማዳን ወደ ዓለም መጣ፤ ከእነርሱም እጅግ የከፋሁ እኔ ነኝ። ¹⁶ነገር ግን ምሕረትን ያገኘሁት ስለዚህ ነው፤ ክርስቶስ ኢየሱስ እጅግ በከፋሁት በእኔ ላይ ፍጹም ትዕግሥቱን ሊያሳይ፣ ለዘላለም ሕይወት በእርሱ ለሚያምኑ ምሳሌ እንድሆን ነው። ¹⁷ለዘመናት ንጉሥ፣ ለማይሞተው፣ ለማይታየው፣ ብቸኛ አምላክ ለሆነው ለእርሱ ከዘላለም እስከ ዘላለም ክብርና ውዳሴ ይሁን፤ አሜን።

መልካሙን ገድል ተጋደል

¹⁸ልጄ ጢሞቴዎስ ሆይ፤ ቀድሞ ስለ አንተ በተነገሩት ትንቢቶች መሠረት ይህን ትእዛዝ አደራ እሰጥሃለሁ፤ በእነርሱም መልካሙን ገድል እንድትጋደል ነው፤ ¹⁹እምነትንና በጎ ሕሊናን ጠብቅ። አንዳንዶች እነዚህን ጥለው እምነታቸውን እንደ መርከብ ሰብረዋል፤ ²⁰ከእነዚህም መካከል ሑሜኔዎስና እስክንድሮስ ናቸው፤ እነርሱንም እግዚአብሔርን እንዳይሳደቡ ይማሩ ዘንድ ለሰይጣን አሳልፌ ሰጠኋቸው።