Kisirchini Timoteo, Lakwanyu ne po Iman
Rwoogetap Paulo eng' Timoteo ne ming'in, agobo getetap kaniset ak riibetap kaneetisyet ne myee.
1 1Paulo, kayooktoindet ne po Kristo Jeso eng' ng'atuutyetap Kwandanyo, Yetindennyu, ak ne po Kristo Jeso genoreetnyo, 2kisirchini Timoteo, lakwani ne po iman eng' kayaneet: Ingotep myeeindo, rireet ak kaalyeet ne punu Kamuktaindet Kwandanyo ak Kristo Jeso Kiptaiyandennyo.
Riip Kaatap Kwanda
3Ko uu ye ki asaain ye ki awendi Makedonia, tebi Efeso si ing'atei piik alak komaneetis kaneetisyet ne teer, 4ak komatesokgei siigutik ak chorwotik che ma tinyei let, che iibune ng'oiywei kosiir poisyetap Kwandanyo ne punu kayaneet. 5Taiyetap ng'atuutyoni ko chamyet ne punu muguleldo ne tiliil, kabwaatet ne myee, ak kayaneet ne po iman. 6Kagoombenoti piik alak eng' tuguuchu ak koweekyingei ng'aleek che ma tinyei let, 7che mache koek kaneetigap ng'atuutik, ago ma kongen kiy ne mwaei anan kiy ne alenen kobaibai.
8Ago kingen keele ng'atuutyet ko myee, ngot kiboisyei ko uu ne nyolu ng'atuutik, 9kingen ni, keele ma kinde ng'atuutyet agobo piik che imaanen, ago agobo che pistoe ng'atuutik ak rebeka, piik che ya ak kiptengeginik, che ma tiliileen ak che ma konyiti Kamuktaindet, agobo che pirei kwandanywa ak kamennywa, ak rumiik, 10piik che ruitogei eng' tengek, murenik che ruitogei ak murenik, piik che aldae otwogik, pooniik, che aname ng'aleegap sere ne ya, ak kiy age tugul ne teer kaneetisyet ne myee, 11ko uu logoiywek che myach che tagunoot che po Kwandanyo ne iberuurot, che ki kigochowa.
Ki Konyoonu Riiretap Kwanda chiito ne Ya Kosiir eng' Tugul
12Amwachini Kristo Jeso Kiptaiyandennyo kongoi, ne ki kigimit anee, amu ki kiit anee ale aiyanaat, ak ki kindoi anee poisyennyi. 13Ki achure Kamuktaindet eng' tai, ak ki ausaus piik, ak ki aa chii ne koroom—ago ki kiriiriewa, amu ki ayai eng' ma naet, eng' ma kayaneet. 14Ki siirtoot myeeindap Kiptaiyandennyo eng' anee, kobooto kayaneet ak chamyet che mi Kristo Jeso. 15Ng'olyoot ne kiyani ak ne nyolu ketaach komugul: ki nyo Kristo Jeso ng'wony si kosar kiptengeginik—anee ko ne ya kosiir eng' icheek. 16Ago ki kiriiriewa agobo ni: eng' anee, ne ya kosiir eng' kiptengeginik, si koboor Kristo Jeso muitaennyi komugul, koek kergeindo agobo che iyani ineendet si konyoor saboondap koigeny. 17Ingotep konyit ak toroornatet Laitoryatap kenyiisyek tugul, ne ma ng'emaksei, ne ma taagu, Kamuktaindet ne inyeendet inyegei, agoi koigeny ak koigeny. Amen.
Baor Loketyet ne Myee
18Timoteo, lakwani, acharunin ng'atuutyoni, ko uu maonatosyek che ki kimwa eng' tai agobo inyee, si ibar loketyet ne myee eng' icheek, 19inam kayaneet ak kabwaatet ne myee. Amu kagoistogei piik alak eng' tuguuchu, ki kobeeti kayanennywa ko uu meli ne beeti. 20kobooto Humenayo ak Alexander, che ki agoito Setani si konetok komachure Kamuktaindet.