1 Timotiu 1

1 ¹Paulu, aposteli Kristi Jesu nípa àṣẹ Baba wa, Olùgbàlà wa, àti ti Kristi Jesu ìrètí wa, ²sí Timoteu, ọmọ mi tòótọ́ nínú ìgbàgbọ́: oore-ọ̀fẹ́, àánú, àti àlàáfíà láti ọ̀dọ̀ Baba wa àti Kristi Jesu Olúwa wa.

Ṣọ́ Agboolé Baba

³Gẹ́gẹ́ bí mo ti rọ̀ ọ́ nígbà tí mo ń lọ sí Makedonia, dúró ní Efesu kí o lè pàṣẹ fún àwọn kan pé kí wọ́n má ṣe kọ́ni ní ẹ̀kọ́ mìíràn, ⁴kí wọ́n má sì ṣe fi ara wọn fún ìtàn asán àti ìtàn ìran tí kò lópin, tí ń dá awuyewuye sílẹ̀ dípò iṣẹ́ ìríjú Baba wa tí ó jẹ́ nípa ìgbàgbọ́. ⁵Èrèdí àṣẹ yìí ni ìfẹ́ tí ó ti ọkàn mímọ́ wá, ẹ̀rí-ọkàn rere, àti ìgbàgbọ́ tòótọ́. ⁶Àwọn kan ti ṣáko kúrò nínú nǹkan wọ̀nyí, wọ́n sì yà sí ọ̀rọ̀ asán, ⁷wọ́n ń fẹ́ láti jẹ́ olùkọ́ òfin, láìní òye ohun tí wọ́n ń sọ tàbí ohun tí wọ́n fi ìgboyà ńlá tẹnu mọ́.

⁸Àwa sì mọ̀ pé òfin dára, bí a bá lò ó ní ọ̀nà tí ó tọ́, ⁹a mọ̀ pé: a kò fi òfin lélẹ̀ fún olódodo, bí kò ṣe fún aláìlófin àti ọlọ̀tẹ̀, àwọn ẹni burúkú àti ẹlẹ́ṣẹ̀, àwọn aláìmọ́ àti aláìbọ̀wọ̀, fún àwọn tí ń lu baba àti ìyá wọn, fún àwọn apànìyàn, ¹⁰àwọn alágbèrè, àwọn ọkùnrin tí ń bá ọkùnrin lòpọ̀, àwọn oníṣòwò ẹrú, àwọn òpùrọ́, àwọn abúra-èké, àti ohunkóhun mìíràn tí ó lòdì sí ẹ̀kọ́ tí ó yè kooro, ¹¹gẹ́gẹ́ bí ìhìnrere ológo ti Baba wa alábùkún-fún, tí a fi lé mi lọ́wọ́.

Àánú Baba Dé Bá Ẹni Tí Ó Burú Jù

¹²Mo dúpẹ́ lọ́wọ́ Kristi Jesu Olúwa wa, ẹni tí ó fún mi lókun, nítorí tí ó kà mí sí olóòótọ́, tí ó sì yàn mí sí iṣẹ́ rẹ̀. ¹³Nígbà kan rí mo sọ̀rọ̀ òdì sí Ọlọ́run, mo ṣe inúnibíni sí àwọn ẹlòmíràn, mo sì jẹ́ oníwà ipá—síbẹ̀ a ṣàánú fún mi, nítorí tí mo ṣe é ní àìmọ̀kan, láìní ìgbàgbọ́. ¹⁴Oore-ọ̀fẹ́ Olúwa wa sì kún àkúnwọ́sílẹ̀ fún mi, pẹ̀lú ìgbàgbọ́ àti ìfẹ́ tí ń bẹ nínú Kristi Jesu. ¹⁵Ọ̀rọ̀ olóòótọ́ ni èyí, tí ó sì yẹ fún ìtẹ́wọ́gbà kíkún: Kristi Jesu wá sí ayé láti gba àwọn ẹlẹ́ṣẹ̀ là—èmi ni ẹni tí ó burú jù nínú wọn. ¹⁶Ṣùgbọ́n nítorí èyí ni a ṣe ṣàánú fún mi: kí Kristi Jesu lè fi sùúrù rẹ̀ kíkún hàn nínú mi, ẹni tí ó burú jù nínú àwọn ẹlẹ́ṣẹ̀, gẹ́gẹ́ bí àpẹẹrẹ fún àwọn tí yóò gbà á gbọ́ fún ìyè àìnípẹ̀kun. ¹⁷Sí Ọba àwọn ìran-ìran, ẹni tí kì í kú, ẹni tí a kò lè rí, Ọlọ́run nìkan ṣoṣo, ni kí ọlá àti ògo wà láé àti láéláé. Àmín.

Ja Ìjà Rere Náà

¹⁸Timoteu, ọmọ mi, mo fi àṣẹ yìí lé ọ lọ́wọ́, gẹ́gẹ́ bí àwọn àsọtẹ́lẹ̀ tí a sọ nípa rẹ nígbà kan rí, kí o lè fi wọ́n ja ìjà rere náà, ¹⁹kí o sì dìímú ìgbàgbọ́ àti ẹ̀rí-ọkàn rere. Nípa kíkọ àwọn nǹkan wọ̀nyí sílẹ̀, àwọn kan ti mú ìgbàgbọ́ wọn ṣègbé bí ọkọ̀ ojú omi tí ó rì. ²⁰nínú wọn ni Himeneu àti Alẹkisanderu, àwọn tí mo fi lé Satani lọ́wọ́ kí a lè kọ́ wọn pé kí wọ́n má ṣe sọ̀rọ̀ òdì sí Ọlọ́run.