1 Timothy 1

1 ¹Ithumwui Avā ithumwui Huikhame, kala ithumwui kachihān Khrista Jishuwui kaso eina Khrista Jishuwui paokazata Paulna, ²shitkasangli iwui khamashung naomayara Timothyli: ithumwui Avā kala ithumwui Proho Khrista Jishuwui eina lukhamashan, phaningkhami kala chingri nali ngasomiranu.

Avāwui Shimkhur Hailu

³Ina Macedoniashong vāki tharan nali kapo tākam eina, mi kaikhana tamchithei khangatei matamchitheialu da ningmi khavai Ephesusli pamlu. ⁴kala hāngkhanganao khararchān kala katang mavai miun kapheili mangalangzaralu da athumli ningmilu. Chikathā china shitkasang mangā eina ithumwui Avāwui kaphā sākhavai otram chi masamphangla, ngaphat-ngayāt naoda shokngasaka. ⁵Hi ningkhamiwui kharin chi wuklung tharzā eina kharā leikashi, kaphā mashun-makhui kala ningkathar shitkasangna. ⁶Kaikhana hibingwui apong chi shimānhaoda makankhanā tuili ningchāngmeihaira. ⁷Athumna ainwui ojā sāngai, kha athumna khi hāng kaji kala khiwui pongli ningmathānlak eina hāng ngasak kaji chi matheimana.

⁸Ara mi akhana ain chi ain athishurda sahaiakha, chi kaphā otna da ithumna thei. ⁹Kala ithumna hila thei: ain hi khamashung khangarongbingwui vang sākahai maningmana, kha makaphā-makhayā kala ngakaikashebing, makaphā kala morei kaphungbing, makathara kala Vareli makatheibing, ashāvā ashāva̱li shaomibing, mi shaokathatbing, ¹⁰shāmkasābing, mayarnao eina mayarnao ngasotabing, raonao leih kasābing, kakapik mibing, kakapik eina kasinbing, kala tamkachithei khamathā chili ngakaishi kachikathā saikorawui vangna. ¹¹Hi ili horsangmi kahai ringphā ithumwui Avāwui tekhamatei paokaphā kathāna.

Avāwui Phaningkhami Zakshimeikapli Rāhaira

¹²Ili pang ngasak ithumwui Proho Khrista Jishuli ina ningshi, kaja ana ili chisin kahaina da khuida, awui otram sāli kapangkhuihaira. ¹³Rida ina Vareli hāngmachina, kateibingli rekharekta, kala sākashe china. Chithālala ina lukhamashan samphanga, kaja ina matheimada, shitkasang maleila sāhaira. ¹⁴Ithumwui Prohowui lukhamashan chi Khrista Jishuwuili khalei shitkasang kala leikashi rumda iwui vang hakmeikhāra. ¹⁵Hi khamashunga chānsam tui, kala shitsangchao phalungki kajina: Khrista Jishuna morei kaphungbingli huikhui khavai okathuili rāhaowa. Athumwui ngachaili iva zakshimeikapna. ¹⁶Kha hiwui vang ina lukhamashan samphanga: katang makhavai kharing samphang khavai ali shitkasanga mibingwui vang ngayo sākhavai, morei kaphungbingwui ngachaili zakshimeikap iwuili, Khrista Jishuna awui ningzinghākharing katong chi chitheira. ¹⁷Katang mavai atambingwui Awunga, kathi makhangavā, mik eina matheikharar, Vare akhamāngli, khayākakā kala tekhamatei chi mashimānda ngasāranu. Amen.

Kaphā Khangarar Chi Ngararlu

¹⁸Inaomayara Timothy, atam akhali nawuitungli hāngkahai khamarānbing athishurda, ina nali hi kakaso horsangmihaira; chithākha chi eina nana kaphā khangarar chi ngararra. ¹⁹Shitkasang kala kaphā mashun-makhui chi singtitlu. Chi ningkachaiwui vang, kaikhana athumwui shitkasang chi marikhong kakai ngasakhaira. ²⁰Athumwui ngachaili Hymenaeus eina Alexander zanga; ina athumli Vareli machipat kaji tamkhui khavai Satanli horsangmi kahaina.