1 Timotheo 1

1 ¹Paulo, mtume wa Kristo Yesu kwa amri ya Baba yetu, Mwokozi wetu, na ya Kristo Yesu tumaini letu, ²kwa Timotheo, mwanangu wa kweli katika imani: neema, huruma, na amani kutoka kwa Baba yetu na Kristo Yesu Bwana wetu.

Linda Nyumba ya Baba

³Kama nilivyokusihi nilipokuwa naenda Makedonia, baki Efeso ili uwaagize watu fulani wasifundishe mafundisho tofauti, ⁴wala wasijishughulishe na hadithi za uongo na orodha za vizazi zisizo na mwisho, zizalizo mabishano badala ya uwakili wa Baba yetu ulio katika imani. ⁵Lengo la agizo hili ni upendo utokao katika moyo safi, dhamiri njema, na imani isiyo na unafiki. ⁶Wengine wamepotoka kutoka katika mambo haya na kugeukia maneno yasiyo na maana, ⁷wakitaka kuwa waalimu wa sheria, bila kufahamu wala wanayoyasema wala wanayoyathibitisha kwa ujasiri mwingi hivyo.

⁸Basi twajua ya kuwa sheria ni njema, ikiwa mtu ataitumia kwa halali, ⁹akijua hili: sheria haikuwekwa kwa ajili ya mwenye haki, bali kwa ajili ya wavunja sheria na waasi, waovu na wenye dhambi, wasio watakatifu na wasiomcha, kwa wale wawapigao baba zao na mama zao, kwa wauaji, ¹⁰wenye dhambi za zinaa, wanaume walalao na wanaume, wafanyabiashara wa watumwa, waongo, waapao kwa uongo, na lolote jingine lipingalo mafundisho yenye afya, ¹¹kulingana na injili ya utukufu ya Baba yetu mbarikiwa, ambayo mimi nimekabidhiwa.

Huruma ya Baba Ilimfikia Aliye Mbaya Kuliko Wote

¹²Namshukuru Kristo Yesu Bwana wetu, aliyenitia nguvu, kwa kuwa aliniona kuwa mwaminifu, akiniweka katika utumishi wake. ¹³Hapo kwanza nalikuwa mtukanaji wa Mungu, na mtesaji, na mwenye jeuri—lakini nalipata huruma, kwa sababu nalitenda hivyo kwa ujinga, nikiwa sina imani. ¹⁴Neema ya Bwana wetu ilinifurikia, pamoja na imani na upendo ulio katika Kristo Yesu. ¹⁵Ni neno la kuaminiwa, tena lastahili kukubalika kabisa: Kristo Yesu alikuja ulimwenguni awaokoe wenye dhambi—ambao mimi ni mbaya kuliko wote. ¹⁶Lakini nalipata huruma kwa ajili hii: ili katika mimi, niliye mbaya kuliko wenye dhambi wote, Kristo Yesu aonyeshe uvumilivu wake wote, niwe kielelezo kwa wale watakaomwamini kwa uzima wa milele. ¹⁷Kwa Mfalme wa nyakati zote, asiyekufa, asiyeonekana, aliye Mungu peke yake, viwe heshima na utukufu milele na milele. Amina.

Pigana Vita Vile Vizuri

¹⁸Timotheo, mwanangu, nakukabidhi agizo hili, kulingana na maneno ya unabii yaliyotamkwa juu yako zamani, ili kwa hayo upate kupigana vita vile vizuri, ¹⁹ukishika imani na dhamiri njema. Kwa kuyakataa haya, wengine wamevunjikiwa na imani yao kama meli ivunjikavyo, ²⁰miongoni mwao ni Himenayo na Aleksanda, ambao nimemkabidhi Shetani wafundishwe wasimtukane Mungu.