1 Timothy 1 FHB Father's Heart Bible™

1 ¹Paul, amar Trankorta amar Pitri, aru amar asha Khrista Jisu laga hukum pora, Khrista Jisu laga ekjon prerit, ²biswas te moi laga hosa bacha Timothy ke: amar Pitri aru amar Prabhu Khrista Jisu pora anugrah, doya aru shanti thakibi.

Pitri laga Ghor ke Rokhya Koribi

³Moi Macedonia te jabole thaka homoi te tumi ke anurodh kora nisena, kunba manuh khan ke alag siksha nashikhabole hukum dibole, tumi Ephesus te thaki thakibi, ⁴aru kahani khan aru khotom nohua bongso-tika khan te mon nadibole; kilemane eitu khan pora biswas dwara aha amar Pitri laga kaam nohoi, kintu khali bitorko he ulai. ⁵Eitu hukum laga maksad tu sapha mon pora aha morom, bhal bibek, aru hosa biswas ase. ⁶Kunba manuh khan eitu khan pora hari kene bekar kotha phale ghuri jaise, ⁷niyom laga guru hobole itcha kori ase, kintu tarkhan ki koi ase aru eman biswas pora ki kotha dhori ase, eitu eku bujhi napare.

⁸Etiya ami jane niyom tu bhal ase, jodi eitu ke niyom hisab te cholai. ⁹eitu jani kene: niyom tu dharmik manuh nimite bona nohoi, kintu niyom nathaka aru bidroh kora khan nimite, dusto aru paapi khan nimite, apobitro aru Isor ke namana khan nimite, nijor baba aru ama ke mara khan nimite, manuh morai diya khan nimite, ¹⁰bebhichari khan nimite, mota logot mota huwa khan nimite, nokor becha-kina kora khan nimite, misa kowa khan nimite, misa kosom kowa khan nimite, aru bhal siksha ke birodh kora jiman sob kaam ase, eitu sob nimite bona ase, ¹¹eitu amar dhonyo Pitri laga mohima thaka susamachar hisab te ase, juntu moi ke bhabai dise.

Sob Pora Biya Manuh ke Pitri laga Doya Ahhise

¹²Moi ke takot diya amar Prabhu Khrista Jisu ke moi dhanyavaad di ase, kilemane Tai moi ke biswasi bhabise, aru moi ke Tar sewa te rakhise. ¹³Moi age te Isor ninda korise, dusra khan ke dukh dise, aru jongli kaam korise—kintu moi ke doya dikhaise, kilemane moi biswas nathaki kene, najani kene eitu korise. ¹⁴Amar Prabhu laga anugrah tu Khrista Jisu te thaka biswas aru morom logot te, moi nimite bisi bhorta hoise. ¹⁵Eitu ekta biswas koribole laga kotha ase aru pura grohon koribole yogya ase: Khrista Jisu paapi khan ke bachabole prithibi te ahhise—aru taikhan majote moi sob pora biya ase. ¹⁶Kintu eitu nimite moi ke doya dikhaise: paapi khan majote sob pora biya moi laga uporte, Khrista Jisu pora Tar pura dhorjo dikhabole, aru ananta jivon nimite Tar uporte biswas koribo khan nimite ekta namuna hobole. ¹⁷Jug jug laga Raja, kitia bhi namora, dikhibo napara, ek-matro Isor ke, sonman aru mohima hodai aru hodai nimite hobi. Amen.

Bhal Juddho Koribi

¹⁸Moi laga bacha Timothy, age te tumi uporte kowa bhabobani khan hisab te, eitu hukum moi tumi ke di ase, eitu khan pora tumi bhal juddho koribo paribole, ¹⁹biswas aru ekta bhal bibek dhori kene. Eitu khan phelai diya pora, kunba manuh khan laga biswas jahaj bhanga nisena nasto hoise, ²⁰taikhan majote Hymenaeus aru Alexander bhi ase, jun duijon ke moi Saitan laga hath te di dise, taikhan Isor ninda nakoribole sikhibole.