1 తిమోతికి 1

1 ¹మన తండ్రి, మన రక్షకుని ఆజ్ఞచేతను, మన నిరీక్షణయైన క్రీస్తుయేసు ఆజ్ఞచేతను, క్రీస్తుయేసు అపొస్తలుడనైన పౌలు, ²విశ్వాసమందు నా నిజమైన బిడ్డయైన తిమోతికి: మన తండ్రి నుండియు మన ప్రభువైన క్రీస్తుయేసు నుండియు కృపయు కనికరమును సమాధానమును కలుగును గాక.

తండ్రి యింటివారిని కాపాడుము

³నేను మాసిదోనియకు వెళ్లుచుండగా నిన్ను వేడుకొనినట్లే, కొందరు వేరైన ఉపదేశము బోధింపకుండునట్లు వారికి ఆజ్ఞాపించుటకు ఎఫెసులో నిలిచియుండుము, ⁴మరియు కల్పనాకథలకును అంతులేని వంశావళులకును వారు లోబడకుండునట్లు నిలిచియుండుము; ఇవి విశ్వాసముద్వారా జరుగు మన తండ్రి యేర్పాటుకు బదులుగా వాదోపవాదములనే పుట్టించును. ⁵ఈ ఆజ్ఞ యొక్క ఉద్దేశము ఏదనగా, పవిత్రహృదయమునుండియు, మంచి మనస్సాక్షినుండియు, నిష్కపటమైన విశ్వాసమునుండియు కలుగు ప్రేమయే. ⁶కొందరు వీటినుండి తొలగిపోయి వ్యర్థమైన మాటలవైపు మళ్లిరి, ⁷వారు తాము చెప్పునదేమో, తాము దృఢముగా వాదించునదేమో గ్రహింపకయే, ధర్మశాస్త్రబోధకులుగా ఉండగోరుచున్నారు.

⁸ధర్మశాస్త్రమును ధర్మశాస్త్రసమ్మతముగా వినియోగించినయెడల అది మంచిదని మనము ఎరుగుదుము, ⁹ఇదియు ఎరుగుచున్నాము: ధర్మశాస్త్రము నీతిమంతునికొరకు నియమింపబడలేదుగాని, ధర్మవిరోధులకును ద్రోహులకును, భక్తిహీనులకును పాపులకును, అపవిత్రులకును దైవభయము లేనివారికిని, తండ్రులను తల్లులను కొట్టువారికిని, నరహంతకులకును, ¹⁰వ్యభిచారులకును, పురుషులతో శయనించు పురుషులకును, నరులను దొంగిలించి అమ్మువారికిని, అబద్ధికులకును, అబద్ధప్రమాణము చేయువారికిని, ఇంకను హితబోధకు విరోధమైన మరి ఏదైనను దానికిని ధర్మశాస్త్రము నియమింపబడెను, ¹¹ఇది నాకు అప్పగింపబడిన, ధన్యుడైన మన తండ్రి మహిమగల సువార్తప్రకారమే యున్నది.

అందరికంటె అధమునికి తండ్రి కనికరము కలిగెను

¹²నన్ను నమ్మకమైనవానిగా ఎంచి తన సేవకు నియమించి నన్ను బలపరచిన మన ప్రభువైన క్రీస్తుయేసునకు కృతజ్ఞతలు చెల్లించుచున్నాను; ¹³పూర్వమందు నేను దేవదూషకుడను, హింసకుడను, హానికరుడనైయుంటిని; అయినను నేను విశ్వాసములేక అజ్ఞానముచేత చేసితిని గనుక కనికరము పొందితిని. ¹⁴మన ప్రభువు కృప క్రీస్తుయేసునందున్న విశ్వాసముతోను ప్రేమతోను నాయందు అత్యధికముగా విస్తరించెను. ¹⁵పాపులను రక్షించుటకు క్రీస్తుయేసు లోకమునకు వచ్చెననునది నమ్మదగినదియు, సంపూర్ణముగా అంగీకరించుటకు యోగ్యమైనదియునైన మాట—వారిలో నేనే అధముడను. ¹⁶అయినను, నిత్యజీవముకొరకు ఆయనయందు విశ్వాసముంచబోవువారికి నేను మాదిరిగా ఉండునట్లు, అధములలో అధముడనైన నాయందు క్రీస్తుయేసు తన సంపూర్ణమైన దీర్ఘశాంతమును కనుపరచుటకే నేను కనికరము పొందితిని. ¹⁷యుగముల రాజు, అక్షయుడు, అదృశ్యుడు, అద్వితీయ దేవుడునైన ఆయనకు ఘనతయు మహిమయు యుగయుగములు కలుగును గాక. ఆమేన్.

మంచి పోరాటము పోరాడుము

¹⁸నా బిడ్డయైన తిమోతీ, నిన్నుగూర్చి పూర్వము చెప్పబడిన ప్రవచనములకు అనుగుణముగా, వాటిచేత నీవు మంచి పోరాటము పోరాడునట్లు, ఈ ఆజ్ఞను నీకు అప్పగించుచున్నాను, ¹⁹విశ్వాసమును మంచి మనస్సాక్షిని గట్టిగా పట్టుకొనియుండుము. కొందరు వీటిని త్రోసివేసి తమ విశ్వాసవిషయమై ఓడ బద్దలైనట్లు నష్టపడిరి; ²⁰వారిలో హుమెనైయును అలెక్సంద్రును ఉన్నారు; వారు దూషింపకుండ నేర్చుకొనునట్లు నేను వారిని సాతానుకు అప్పగించితిని.