ତୀମଥିଙ୍କ ପ୍ରତି, ମୋହର ପ୍ରକୃତ ସନ୍ତାନ

ମଣ୍ଡଳୀକୁ ସୁବ୍ୟବସ୍ଥିତ କରିବା ଓ ସୁଶିକ୍ଷାକୁ ରକ୍ଷା କରିବା ବିଷୟରେ ଯୁବକ ତୀମଥିଙ୍କ ପ୍ରତି ପାଉଲଙ୍କ ପାଳକୀୟ ପରାମର୍ଶ।

ଅଧ୍ୟାୟ 1।

ପାଉଲ, ଆମ୍ଭମାନଙ୍କ ପିତା, ଆମ୍ଭମାନଙ୍କ ତ୍ରାଣକର୍ତ୍ତା ଓ ଆମ୍ଭମାନଙ୍କ ଭରସାସ୍ଵରୂପ ଖ୍ରୀଷ୍ଟ ଯୀଶୁଙ୍କ ଆଜ୍ଞା ଅନୁସାରେ ଖ୍ରୀଷ୍ଟ ଯୀଶୁଙ୍କ ଜଣେ ପ୍ରେରିତ, ବିଶ୍ଵାସରେ ମୋହର ପ୍ରକୃତ ସନ୍ତାନ ତୀମଥିଙ୍କ ପ୍ରତି: ଆମ୍ଭମାନଙ୍କ ପିତା ଓ ଆମ୍ଭମାନଙ୍କ ପ୍ରଭୁ ଖ୍ରୀଷ୍ଟ ଯୀଶୁଙ୍କଠାରୁ ଅନୁଗ୍ରହ, କୃପା ଓ ଶାନ୍ତି ହେଉ।

ପିତାଙ୍କ ଗୃହକୁ ରକ୍ଷା କର

ମାକିଦନିଆକୁ ଯିବା ସମୟରେ ମୁଁ ଯେପରି ତୁମ୍ଭକୁ ଅନୁରୋଧ କରିଥିଲି, ସେହିପରି ତୁମ୍ଭେ ଏଫିସରେ ରହି କେତେକ ଲୋକଙ୍କୁ ଭିନ୍ନ ଶିକ୍ଷା ନ ଦେବା ପାଇଁ ଆଦେଶ ଦିଅ, ପୁଣି ବିଶ୍ଵାସ ଦ୍ଵାରା ସାଧିତ ଆମ୍ଭମାନଙ୍କ ପିତାଙ୍କ ଗୃହଶାସନ ପରିବର୍ତ୍ତେ ଯାହା କେବଳ ତର୍କବିତର୍କ ଜନ୍ମାଏ, ଏପରି କଳ୍ପିତ କାହାଣୀ ଓ ଅସୀମ ବଂଶାବଳୀରେ ସେମାନେ ଯେପରି ଆସକ୍ତ ନ ହୁଅନ୍ତି। ଏହି ଆଜ୍ଞାର ଉଦ୍ଦେଶ୍ୟ ହେଉଛି ପବିତ୍ର ହୃଦୟରୁ, ସୁବିବେକରୁ ଓ ନିଷ୍କପଟ ବିଶ୍ଵାସରୁ ଜାତ ପ୍ରେମ। କେତେକ ଲୋକ ଏସବୁରୁ ବିଚଳିତ ହୋଇ ଅସାର କଥାଆଡ଼କୁ ଫେରିଯାଇଅଛନ୍ତି, ସେମାନେ ବ୍ୟବସ୍ଥାର ଶିକ୍ଷକ ହେବାକୁ ଇଚ୍ଛା କରନ୍ତି, କିନ୍ତୁ ଯାହା କହନ୍ତି ଓ ଯାହା ଏତେ ଦୃଢ଼ ଭାବରେ ଜୋର ଦେଇ କହନ୍ତି, ତାହା ସେମାନେ ବୁଝନ୍ତି ନାହିଁ।

ଏବେ ଆମ୍ଭେମାନେ ଜାଣୁ ଯେ, ଯଦି କେହି ବ୍ୟବସ୍ଥାକୁ ବ୍ୟବସ୍ଥାନୁଯାୟୀ ବ୍ୟବହାର କରେ, ତେବେ ବ୍ୟବସ୍ଥା ଉତ୍ତମ, ଏହା ଜାଣି ଯେ, ବ୍ୟବସ୍ଥା ଧାର୍ମିକ ଲୋକଙ୍କ ନିମନ୍ତେ ସ୍ଥାପିତ ନୁହେଁ, ମାତ୍ର ବ୍ୟବସ୍ଥାହୀନ ଓ ବିଦ୍ରୋହୀ, ଦୁଷ୍ଟ ଓ ପାପୀ, ଅଧାର୍ମିକ ଓ ଅପବିତ୍ର ଲୋକଙ୍କ ନିମନ୍ତେ, ଯେଉଁମାନେ ଆପଣା ପିତା ଓ ମାତାଙ୍କୁ ପ୍ରହାର କରନ୍ତି ସେମାନଙ୍କ ନିମନ୍ତେ, ନରଘାତକମାନଙ୍କ ନିମନ୍ତେ, ବ୍ୟଭିଚାରୀ, ପୁଂମୈଥୁନକାରୀ, ଦାସବ୍ୟବସାୟୀ, ମିଥ୍ୟାବାଦୀ, ମିଥ୍ୟା ଶପଥକାରୀ ଲୋକଙ୍କ ନିମନ୍ତେ, ପୁଣି ଅନ୍ୟ ଯାହା କିଛି ଉତ୍ତମ ଶିକ୍ଷାର ବିରୁଦ୍ଧ, ସେସବୁ ନିମନ୍ତେ ସ୍ଥାପିତ, ଯାହା ଆମ୍ଭମାନଙ୍କ ଧନ୍ୟ ପିତାଙ୍କ ମହିମାମୟ ସୁସମାଚାର ଅନୁଯାୟୀ, ଆଉ ତାହା ମୋʼ ହସ୍ତରେ ସମର୍ପିତ ହୋଇଅଛି।

ପିତାଙ୍କ କୃପା ନିକୃଷ୍ଟତମ ଲୋକ ନିକଟକୁ ଆସିଲା

ମୋତେ ଯେ ବଳ ଦେଲେ, ସେହି ଆମ୍ଭମାନଙ୍କ ପ୍ରଭୁ ଖ୍ରୀଷ୍ଟ ଯୀଶୁଙ୍କୁ ମୁଁ ଧନ୍ୟବାଦ ଦେଉଅଛି, କାରଣ ସେ ମୋତେ ବିଶ୍ଵସ୍ତ ବୋଲି ବିବେଚନା କରି ଆପଣା ସେବାରେ ନିଯୁକ୍ତ କଲେ, ଯଦ୍ୟପି ମୁଁ ପୂର୍ବେ ଈଶ୍ଵରନିନ୍ଦକ, ଅତ୍ୟାଚାରୀ ଓ ଉଦ୍ଧତ ଥିଲି, ତଥାପି ମୁଁ କୃପା ପ୍ରାପ୍ତ ହେଲି, କାରଣ ମୁଁ ଅବିଶ୍ଵାସରେ ଅଜ୍ଞାନ ହୋଇ ଏସବୁ କରିଥିଲି। ପୁଣି ଆମ୍ଭମାନଙ୍କ ପ୍ରଭୁଙ୍କ ଅନୁଗ୍ରହ ଖ୍ରୀଷ୍ଟ ଯୀଶୁଙ୍କଠାରେ ଥିବା ବିଶ୍ଵାସ ଓ ପ୍ରେମ ସହିତ ମୋʼ ନିମନ୍ତେ ଅତ୍ୟନ୍ତ ବହୁଳ ହେଲା। ଏହି ବାକ୍ୟ ବିଶ୍ଵାସଯୋଗ୍ୟ ଓ ସର୍ବତୋଭାବେ ଗ୍ରହଣଯୋଗ୍ୟ ଯେ, ଖ୍ରୀଷ୍ଟ ଯୀଶୁ ପାପୀମାନଙ୍କୁ ପରିତ୍ରାଣ କରିବା ନିମନ୍ତେ ଜଗତକୁ ଆସିଲେ — ସେମାନଙ୍କ ମଧ୍ୟରେ ମୁଁ ନିକୃଷ୍ଟତମ। କିନ୍ତୁ ଏହି ନିମନ୍ତେ ମୁଁ କୃପା ପ୍ରାପ୍ତ ହେଲି, ଯେପରି ଖ୍ରୀଷ୍ଟ ଯୀଶୁ ନିକୃଷ୍ଟତମ ପାପୀ ମୋʼ ଠାରେ ଆପଣା ସମ୍ପୂର୍ଣ୍ଣ ଦୀର୍ଘସହିଷ୍ଣୁତା ଦେଖାଇ ପାରନ୍ତି, ଯେଉଁମାନେ ଅନନ୍ତ ଜୀବନ ନିମନ୍ତେ ତାହାଙ୍କଠାରେ ବିଶ୍ଵାସ କରିବେ, ସେମାନଙ୍କ ପ୍ରତି ଏକ ଆଦର୍ଶସ୍ଵରୂପ ହେବା ପାଇଁ। ଯୁଗସମୂହର ରାଜା, ଅକ୍ଷୟ, ଅଦୃଶ୍ୟ, ଅଦ୍ଵିତୀୟ ଈଶ୍ଵରଙ୍କ ସମ୍ମାନ ଓ ମହିମା ଯୁଗେ ଯୁଗେ ହେଉ। ଆମେନ୍‍।

ଉତ୍ତମ ଯୁଦ୍ଧ କର

ହେ ବତ୍ସ ତୀମଥି, ତୁମ୍ଭ ବିଷୟରେ ପୂର୍ବେ ଯେଉଁ ଭାବବାଣୀ କଥିତ ହୋଇଥିଲା, ତଦନୁସାରେ ମୁଁ ତୁମ୍ଭକୁ ଏହି ଆଦେଶ ସମର୍ପଣ କରୁଅଛି, ଯେପରି ତଦ୍ଵାରା ତୁମ୍ଭେ ଉତ୍ତମ ଯୁଦ୍ଧ କରିପାର, ଆଉ ବିଶ୍ଵାସ ଓ ସୁବିବେକ ଧରି ରଖିପାର। କେତେକ ଲୋକ ଏସବୁ ଅଗ୍ରାହ୍ୟ କରି ବିଶ୍ଵାସରୂପ ଜାହାଜର ବିନାଶ ଘଟାଇଅଛନ୍ତି, ସେମାନଙ୍କ ମଧ୍ୟରେ ହୁମନାୟ ଓ ଆଲେକ୍‍ଜାଣ୍ଡାର ଅଛନ୍ତି, ମୁଁ ସେମାନଙ୍କୁ ଶୟତାନ ହସ୍ତରେ ସମର୍ପଣ କରିଅଛି, ଯେପରି ସେମାନେ ଈଶ୍ଵରଙ୍କୁ ନିନ୍ଦା ନ କରିବା ପାଇଁ ଶିକ୍ଷା ପାଆନ୍ତି।