Ken ni Timoteo, ti Pudno nga Anakko

Ti balakad ni Pablo a kas pastor iti agtutubo a ni Timoteo maipapan iti panangurnos iti iglesia ken panangsalaknib iti umiso a pannursuro.

Kapitulo 1.

Siak ni Pablo, apostol ni Cristo Jesus gapu iti bilin ni Amatayo, a Mangisalakantayo, ken ni Cristo Jesus a namnamatayo, ken ni Timoteo, ti pudno nga anakko iti pammati: Parabur, asi, ken kappia manipud ken ni Amatayo ken ni Cristo Jesus nga Apotayo.

Salaknibam ti Pamilia ni Ama

Kas panangidagadagko kenka idi pumanawak nga mapan idiay Macedonia, agtalinaedka idiay Efeso tapno bilinem dagiti dadduma a tattao a dida agisuro iti sabali a pannuruan, wenno iyaon ti bagida kadagiti sarsarita a di pudno ken kadagiti awan patinggana a listaan ti kaputotan, a pakaigapuan dagiti panagduadua imbes a ti trabaho nga intalek ni Amatayo babaen ti pammati. Ti panggep daytoy a bilin ket ayat a naggapu iti nadalus a puso, nasayaat a konsiensia, ken pudno a pammati. Adda dadduma a naawan manipud kadagitoy ket nagturong kadagiti awan serserbina a sasao, a mayatda nga agbalin a manursuro iti linteg, nupay dida maawatan ti ibagbagada wenno dagiti ipapilitda a buyogen ti napigsa a panagtalek.

Ngem ammotayo a nasayaat ti linteg, no usaren a maitunos iti linteg, Ammotayo daytoy: ti linteg ket saan a naipatulod para kadagiti nalinteg no di ket para kadagiti awan linteg ken managsukir, dagiti nadangkes ken managbasol, dagiti saan a nasantuan ken awan raem, dagiti mangsaplit kadagiti amada ken inada, dagiti mammapatay, dagiti makimaingel, dagiti lalaki a makiturog kadagiti lalaki, dagiti mangilako iti tao, dagiti manangulbod, dagiti agsapata iti kinaulbod, ken ania man a sabali pay a maibusor iti umiso a pannursuro, a maitunos iti nadayag a Naimbag a Damag ni nabendisionan nga Amatayo, nga intalek kaniak.

Immay ti Asi ni Ama Kadagiti Kakaruan

Agyamanak ken ni Cristo Jesus nga Apotayo, a nangpabileg kaniak, gapu ta imbilangnak a mapagtalkan ket impaayna kaniak ti panagserbi kenkuana. Idi, linalaisko ti Dios, pinarigatko dagiti dadduma, ket naranggasak—ngem naasianak, ta inaramidko dayta nga awan ammok ken awan pammatik. Nag-umbaw ti parabur ni Apotayo para kaniak, buyogen ti pammati ken ayat ken ni Cristo Jesus. Mapagtalkan daytoy a sao ket maikari a gawaten iti naan-anay: Immay ni Cristo Jesus iti lubong tapno isalakanna dagiti managbasol—siak ti kakaruan kadakuada. Ngem naasianak gapu iti daytoy: kaniak, a kakaruan kadagiti managbasol, mapakita ni Cristo Jesus ti naan-anay a panaganusna, kas pagwadan para kadagiti mamatinto kenkuana iti biag nga agnanayon. Maipaay koma ti dayaw ken dayag iti Ari dagiti panawen, a di matay, di makita, ti Laeng Dios, agnanayon ken agnanayon. Amen.

Makigubatka iti Nasayaat a Gubat

Timoteo, anakko, italekko kenka daytoy a bilin, a maitunos kadagiti padto nga naibaga idi maipapan kenka, tapno babaen kadagita makigubatka iti nasayaat a gubat, a mangsalimetmet iti pammati ken nasayaat a konsiensia. Gapu iti panangsarikedked kadagitoy, naburak ti pammati dagiti dadduma a kas iti barko, agraman da Himeneo ken Alejandro, a intedko ken ni Satanas tapno maisuroda a dida lalaisen ti Dios.