2 Tẹsalonika 3

3 ¹Níkẹyìn, ẹ̀yin ará, ẹ gbàdúrà fún wa kí ọ̀rọ̀ Olúwa wa Jesu lè máa tàn kálẹ̀ kíákíá, kí a sì bọlá fún un, gẹ́gẹ́ bí ó ti rí láàrin yín, ²àti kí a lè gbà wá sílẹ̀ lọ́wọ́ àwọn ènìyàn alárékérekè àti búburú; nítorí kì í ṣe gbogbo ènìyàn ni ó jẹ́ onígbàgbọ́. ³Ṣùgbọ́n olóòótọ́ ni Olúwa, ẹni tí yóò fún yín lókun, tí yóò sì ṣọ́ yín kúrò lọ́wọ́ ẹni ibi náà. ⁴A ní ìgbẹ́kẹ̀lé nínú Olúwa pé ẹ̀yin ń ṣe, tí ẹ ó sì máa bá a lọ láti ṣe, ohun tí a pàṣẹ. ⁵Kí Olúwa darí ọkàn yín sínú ìfẹ́ Baba wa àti sínú ìforítì Kristi.

Ìkìlọ̀ Lòdì sí Ìmẹ́lẹ́

⁶Ẹ̀yin ará, ní orúkọ Olúwa wa Jesu Kristi, a pàṣẹ fún yín pé: kí ẹ yẹra fún gbogbo arákùnrin tí ń gbé ní ìmẹ́lẹ́, tí ó lòdì sí àṣà àtọwọ́dọ́wọ́ tí ẹ gbà lọ́wọ́ wa. ⁷Ẹ̀yin fúnra yín mọ̀ pé ó yẹ kí ẹ máa tẹ̀lé àpẹẹrẹ wa, nítorí àwa kò hùwà ìmẹ́lẹ́ láàrin yín. ⁸Àwa kò jẹ oúnjẹ ẹnikẹ́ni lọ́fẹ̀ẹ́; dípò bẹ́ẹ̀, a ṣiṣẹ́ lọ́sàn-án àti lóru, nínú làálàá àti ìnira, kí a má bàa di ẹrù wíwúwo fún ẹnikẹ́ni nínú yín. ⁹Kì í ṣe pé a kò ní ẹ̀tọ́, ṣùgbọ́n láti fi ara wa ṣe àpẹẹrẹ fún yín láti tẹ̀lé. ¹⁰Àní nígbà tí a wà pẹ̀lú yín, a pàṣẹ fún yín pé: bí ẹnikẹ́ni bá kọ̀ láti ṣiṣẹ́, kí ó má jẹun. ¹¹Nítorí a gbọ́ pé àwọn kan láàrin yín ń gbé ní ìmẹ́lẹ́, tí wọn kò ṣe iṣẹ́ kankan bí kò ṣe pé wọ́n ń dá sí ọ̀rọ̀ àwọn ẹlòmíràn. ¹²Irú àwọn ènìyàn bẹ́ẹ̀ ni a pàṣẹ fún, tí a sì ń rọ̀ nínú Olúwa Jesu Kristi pé: kí wọ́n máa ṣiṣẹ́ jẹ́ẹ́jẹ́ẹ́, kí wọ́n sì máa jẹ àkàrà ti ara wọn. ¹³Ní ti ẹ̀yin, ẹ̀yin ará, ẹ má ṣe rẹ̀wẹ̀sì nínú ṣíṣe rere. ¹⁴Bí ẹnikẹ́ni kò bá gbọ́ ọ̀rọ̀ wa nínú lẹ́tà yìí, ẹ ṣe àmì sí i, kí ẹ má sì bá a kẹ́gbẹ́, kí ojú lè tì í. ¹⁵Síbẹ̀ ẹ má ṣe kà á sí ọ̀tá, bí kò ṣe kí ẹ kìlọ̀ fún un gẹ́gẹ́ bí arákùnrin.

Àlàáfíà, Ìkíni, àti Oore-ọ̀fẹ́

¹⁶Kí Olúwa àlàáfíà fúnra rẹ̀ fún yín ní àlàáfíà nígbà gbogbo, ní gbogbo ọ̀nà. Kí Olúwa wà pẹ̀lú gbogbo yín.

¹⁷Èmi, Paulu, ni mo fi ọwọ́ ara mi kọ ìkíni yìí—èyí ni àmì tí ó fihàn pé gbogbo lẹ́tà tí ó ti ọ̀dọ̀ mi wá jẹ́ òtítọ́; báyìí ni mo ṣe ń kọ̀wé. ¹⁸Kí oore-ọ̀fẹ́ Olúwa wa Jesu Kristi wà pẹ̀lú gbogbo yín.