2 தெசலோனிக்கேயர் 3

3 ¹கடைசியாக, சகோதர சகோதரிகளே, நம்முடைய கர்த்தராகிய இயேசுவின் வார்த்தை உங்களிடத்தில் விளங்கினதுபோல வேகமாய்ப் பரவி மகிமைப்படும்படிக்கும், ²மாறுபாடும் பொல்லாப்பும் உள்ள மனிதரிடமிருந்து நாங்கள் விடுவிக்கப்படும்படிக்கும் எங்களுக்காக ஜெபியுங்கள்; ஏனெனில் எல்லாருக்கும் விசுவாசம் இல்லை. ³ஆனாலும் கர்த்தர் உண்மையுள்ளவர்; அவர் உங்களை உறுதிப்படுத்தி, தீயவனிடமிருந்து காத்துக்கொள்வார். ⁴நாங்கள் கட்டளையிடுகிறவைகளை நீங்கள் செய்கிறீர்கள் என்றும், இனிமேலும் செய்வீர்கள் என்றும் கர்த்தருக்குள் உங்களைக்குறித்து நம்பிக்கையாயிருக்கிறோம். ⁵கர்த்தர் உங்கள் இருதயங்களை எங்கள் பிதாவின் அன்பிற்குள்ளும், கிறிஸ்துவின் பொறுமைக்குள்ளும் நடத்துவாராக.

சோம்பலுக்கு எதிரான எச்சரிப்பு

⁶சகோதர சகோதரிகளே, நம்முடைய கர்த்தராகிய இயேசு கிறிஸ்துவின் நாமத்தில் உங்களுக்குக் கட்டளையிடுகிறோம்: நீங்கள் எங்களிடமிருந்து பெற்றுக்கொண்ட பாரம்பரியத்திற்கு விரோதமாய், சோம்பலாய் வாழ்கிற ஒவ்வொரு சகோதரனையும் விட்டு விலகியிருங்கள். ⁷நீங்களே எங்களைப் பின்பற்ற வேண்டியது எப்படியென்று அறிந்திருக்கிறீர்கள்; ஏனெனில் நாங்கள் உங்களிடத்தில் சோம்பலாய் நடந்துகொள்ளவில்லை. ⁸நாங்கள் ஒருவருடைய அப்பத்தையும் இலவசமாய்ச் சாப்பிடவில்லை; மாறாக, உங்களில் ஒருவருக்கும் பாரமாயிராதபடிக்கு, இரவும் பகலும் பிரயாசத்தோடும் வருத்தத்தோடும் வேலைசெய்தோம். ⁹எங்களுக்கு உரிமை இல்லாததினால் அல்ல, நீங்கள் பின்பற்றத்தக்க முன்மாதிரியாக எங்களை உங்களுக்குக் காட்டவேண்டுமென்பதற்காகவே அப்படிச் செய்தோம். ¹⁰நாங்கள் உங்களோடிருந்தபோதும், ‘ஒருவன் வேலைசெய்ய மனதில்லாதிருந்தால், அவன் சாப்பிடவும் வேண்டாம்’ என்று உங்களுக்குக் கட்டளையிட்டோம். ¹¹ஏனெனில், உங்களில் சிலர் ஒரு வேலையும் செய்யாமல், சோம்பலாய் வாழ்ந்து, அனாவசியக் காரியங்களில் தலையிடுகிறார்கள் என்று கேள்விப்படுகிறோம். ¹²அப்படிப்பட்டவர்கள் அமைதலாய் வேலைசெய்து, தங்கள் சொந்த அப்பத்தைச் சாப்பிடவேண்டுமென்று, நம்முடைய கர்த்தராகிய இயேசு கிறிஸ்துவுக்குள் அவர்களுக்குக் கட்டளையிட்டு புத்திசொல்லுகிறோம். ¹³நீங்களோ, சகோதர சகோதரிகளே, நன்மைசெய்கிறதில் சோர்ந்துபோகாதிருங்கள். ¹⁴இந்த நிருபத்தில் சொல்லிய எங்கள் வார்த்தைக்கு ஒருவன் கீழ்ப்படியாதிருந்தால், அவனைக் குறித்துவைத்து, அவனோடு கலந்திராதிருங்கள்; அப்பொழுது அவன் வெட்கப்படுவான். ¹⁵ஆனாலும் அவனைச் சத்துருவாக எண்ணாமல், சகோதரனாகக் கருதி எச்சரியுங்கள்.

சமாதானம், வாழ்த்து, கிருபை

¹⁶சமாதானத்தின் கர்த்தர் தாமே உங்களுக்கு எப்பொழுதும், எல்லா விதத்திலும் சமாதானத்தைத் தந்தருளுவாராக. கர்த்தர் உங்கள் அனைவரோடும் இருப்பாராக.

¹⁷பவுலாகிய நான் இந்த வாழ்த்துதலை என் சொந்தக் கையால் எழுதுகிறேன்—இதுவே என்னிடமிருந்து வரும் ஒவ்வொரு நிருபமும் உண்மையானது என்பதற்கான அடையாளம்; இப்படியே நான் எழுதுகிறேன். ¹⁸நம்முடைய கர்த்தராகிய இயேசு கிறிஸ்துவின் கிருபை உங்கள் அனைவரோடும் இருப்பதாக.