帖撒羅尼迦後書 3

3 ¹最後,弟兄姊妹,你哋要為我哋禱告,求我哋主耶穌嘅道理快快傳開,得人尊崇,好似喺你哋中間一樣, ²又求我哋可以脫離嗰啲乖僻同埋邪惡嘅人;因為唔係個個都有信心。 ³不過,主係信實嘅,佢會堅固你哋,保護你哋脫離嗰個惡者。 ⁴我哋靠住主,對你哋有信心:我哋所吩咐嘅,你哋一直有做,而且會繼續咁做。 ⁵願主引導你哋嘅心,進入我哋嘅父嘅愛,進入基督嘅忍耐。

警戒懶惰

⁶弟兄姊妹,我哋奉主耶穌基督嘅名吩咐你哋:凡係遊手好閒、唔按照你哋從我哋所領受嘅傳統而行嘅弟兄,你哋都要遠離佢。 ⁷你哋自己知道應該點樣效法我哋,因為我哋喺你哋中間唔曾遊手好閒。 ⁸我哋冇白食過人嘅飯;反而係晝夜做工,勞碌辛苦,為咗唔想連累你哋任何一個。 ⁹唔係話我哋冇呢個權利,而係要親身做個榜樣畀你哋效法。 ¹⁰我哋同你哋喺埋一齊嘅時候,就吩咐過你哋:如果有人唔肯做工,佢就唔應該食飯。 ¹¹因為我哋聽聞你哋中間有啲人遊手好閒,唔做正經工夫,反而好管閒事。 ¹²我哋奉主耶穌基督吩咐同勸勉呢啲人:要安安靜靜咁做工,食自己嘅飯。 ¹³至於你哋,弟兄姊妹,行善千祈唔好灰心。 ¹⁴如果有人唔聽從我哋喺呢封信裏面所講嘅話,你哋就要記住佢,唔好同佢來往,好等佢覺得羞愧。 ¹⁵不過唔好當佢係仇敵,只要當佢係弟兄咁警戒佢。

平安、問候同恩典

¹⁶願賜平安嘅主親自時時、事事賜平安畀你哋。願主同你哋眾人同在。

¹⁷我保羅親手寫呢句問候——呢個係我每封信真確嘅記號;我就係咁樣寫嘅。 ¹⁸願我哋主耶穌基督嘅恩典同你哋眾人同在。