2 ተሰሎንቄ 3

3 ¹ወንድሞችና እኅቶች ሆይ፣ በመጨረሻም የጌታችን የኢየሱስ ቃል በእናንተ ዘንድ እንደ ሆነው ፈጥኖ እንዲስፋፋና እንዲከብር ስለ እኛ ጸልዩ፤ ²ሁሉ አማኝ አይደለምና ከጠማማዎችና ከክፉ ሰዎች እንድንድን ጸልዩ። ³ጌታ ግን የታመነ ነው፤ እርሱም ያጸናችኋል፤ ከክፉውም ይጠብቃችኋል። ⁴ያዘዝናችሁን እንደምታደርጉትና ወደ ፊትም እንደምታደርጉት በጌታ ታምነናል። ⁵ጌታም ልባችሁን ወደ አባታችን ፍቅርና ወደ ክርስቶስ ትዕግሥት ይምራ።

ስለ ስንፍና የተሰጠ ማስጠንቀቂያ

⁶ወንድሞችና እኅቶች ሆይ፣ በጌታችን በኢየሱስ ክርስቶስ ስም እናዛችኋለን፤ ከእኛ ከተቀበላችሁት ወግ ውጭ በስንፍና ከሚኖር ወንድም ሁሉ ራቁ። ⁷እኛን እንዴት መምሰል እንዳለባችሁ እናንተ ራሳችሁ ታውቃላችሁ፤ በእናንተ ዘንድ ሰነፎች አልነበርንምና። ⁸የማንንም እንጀራ በከንቱ አልበላንም፤ ይልቁንም ከእናንተ በማንም ላይ ሸክም እንዳንሆን ሌትና ቀን በድካምና በጥረት ሠራን። ⁹ይህንም ያደረግነው መብት አጥተን ሳይሆን፣ ራሳችንን እንድትመስሉን ምሳሌ ልናደርግላችሁ ነው። ¹⁰ከእናንተ ጋራ በነበርንም ጊዜ፣ “ሊሠራ የማይወድ ቢኖር አይብላ” ብለን አዘናችሁ። ¹¹ከእናንተ መካከል አንዳንዶች ሥራ ሳይሠሩ በሌሎች ጒዳይ ጣልቃ እየገቡ በስንፍና የሚኖሩ እንዳሉ ሰምተናልና። ¹²እንደነዚህ ያሉትን ሰዎች በጌታ በኢየሱስ ክርስቶስ እናዛለን፤ እንመክራቸውማለንም፤ በጸጥታ እየሠሩ የራሳቸውን እንጀራ ይብሉ። ¹³እናንተ ግን ወንድሞችና እኅቶች ሆይ፣ መልካም በማድረግ አትታክቱ። ¹⁴በዚህ መልእክት ያለውን ቃላችንን የማይታዘዝ ማንም ቢኖር፣ ይፈር ዘንድ ምልክት አድርጉበት፤ ከእርሱም ጋራ አትተባበሩ። ¹⁵ነገር ግን እንደ ወንድም ገሥጹት እንጂ እንደ ጠላት አትቍጠሩት።

ሰላም፣ ሰላምታና ጸጋ

¹⁶የሰላም ጌታ ራሱ ዘወትር በሁሉ መንገድ ሰላምን ይስጣችሁ። ጌታ ከሁላችሁ ጋራ ይሁን።

¹⁷እኔ ጳውሎስ ይህን ሰላምታ በገዛ እጄ እጽፋለሁ፤ ይህም ከእኔ የሚመጣ መልእክት ሁሉ እውነተኛ መሆኑ ምልክት ነው፤ የምጽፈውም እንዲህ ነው። ¹⁸የጌታችን የኢየሱስ ክርስቶስ ጸጋ ከሁላችሁ ጋራ ይሁን።