O Tatishi Jajatsü Asoshi Sarasademang
Pauli Kibuba o yakta jajatsü asoshi sarasadem amang, idangji mapa kati jagi ranglok: arogo nungi kari tasena toka, mapa meinyaki pila, tangar nem agizüka alir. Pai pei sasa aonung aser anogo tasena inyakba madang noktak. Iba amaba nisung machiang, pa den mejizüki, saka samatsü anema masü, adianu anema pa dang arüjang.
3 1Adianutem, nenok rongnung liasü ama, asenok Kibuba Yisu o yakta jajatsü aser sentsüwangshi alitsü asoshi, onok asoshi sarasademjang; 2aser mashileni aoba aser tamajungba nisungtem nungi onok kümzüktsü asoshibo sarasademjang; kechiaser ajaki tamanger masü. 3Saka Kibuba tamayazür lir, shibai nenok tashi itdaktsü aser tamajungba nungi nenok sottsü. 4Onoki nenok dang melaba, nenoki inyaker aser teti inyakdi sütsü ta, Kibuba dang amanger. 5Kibubai nenok mulung asen Tebu temeim nung aser Khrista aremzüka nung anidakang.
Mapa Meinyaki Liba Anema Tekümdangba
6Adianutem, asenok Kibuba Yisu Khrista tenüng nung onoki nenok dang melar, nenoki onok nungi agizükba tesayur anema, mapa meinyaki aliba adianu shia nungi nenok pila liang. 7Nenok sasai onok jizüktsü tim ta nenoki metet, kechiaser onoki nenok rongnung mapa meinyaki maliasü. 8Onoki shinga chiyungtsü tazüng mechi; saka nenok shinga nem khuret ka masütsü asoshi, onoki tasena aser timtem tekangshi agi, aonung aser anogo tasena inyak. 9Onok tim manüngtsü ta masü, saka nenoki onok jizüktsü asoshi, onoki pei sasa temaitsü ka yanglu. 10Onoki nenok den alidang nungbo, kari tasena inyaktsü memulungra pai machitsü ta, onoki nenok dang mela. 11Kechiaser nenok rongnung karibo mapa meinyaki li, tasena nung mazüngi mali, saka tangar nisung mapa nung jarutsür ta, onoki angashir. 12Yamala nisungtem dang Kibuba Yisu Khrista nung onoki melar aser mepishir, parnoki miima tasena inyaka pei chiyungtsü chitsü ta. 13Adianutem, nenoki tajung inyak nung ania teli. 14Kari iba shiti nung onok o mamangra, pa maksütsü asoshi, pa meshiteta yua aser pa den teliloka liang. 15Saka pa tsükchir ka ta magizük, saka pa adianu ka ta tekümdangang.
Tesünep, Salem O, aser Taochi
16Tesünep Kibuba sasai teti, lenmang ajak nung nenok nem tesünep agüjang. Kibuba nenok ajak den aliang.
17Ni, Paul, kü sasa teka agi iba salem o zülur—kü nungi shiti ajak atangji ni zülu ta temaitsü lir; ni yamai zülur. 18Asenok Kibuba Yisu Khrista taochi nenok ajak den aliang.