വചനം സ്വതന്ത്രമായി പ്രചരിക്കേണ്ടതിന് പ്രാർഥിക്കുവിൻ

വചനം മുന്നോട്ട് ഓടേണ്ടതിന് പ്രാർത്ഥിക്കാൻ പൗലൊസ് ആവശ്യപ്പെടുന്നു, പിന്നെ ഒരു പ്രശ്നത്തിലേക്ക് തിരിയുന്നു: സഭയിലെ ചിലർ വേല നിർത്തി, മറ്റുള്ളവരെ ആശ്രയിച്ചു ജീവിച്ച് പരകാര്യങ്ങളിൽ ഇടപെടുന്നവരായിത്തീർന്നിരിക്കുന്നു. രാപ്പകൽ താൻ ചെയ്ത അദ്ധ്വാനം അവൻ ചൂണ്ടിക്കാട്ടുന്നു. അങ്ങനെയുള്ളവനെ ശ്രദ്ധിച്ചുവെക്കുക, അവനോട് ഇടപഴകരുത്; എങ്കിലും ശത്രുവായല്ല, സഹോദരനായി അവനെ ബുദ്ധിയുപദേശിക്കുക.

അധ്യായം 3.

ഒടുവിൽ, സഹോദരീസഹോദരന്മാരേ, നമ്മുടെ കർത്താവായ യേശുവിന്റെ വചനം നിങ്ങളുടെ ഇടയിൽ എന്നപോലെ വേഗത്തിൽ മുന്നേറുകയും മഹത്ത്വപ്പെടുകയും ചെയ്യേണ്ടതിന് ഞങ്ങൾക്കുവേണ്ടി പ്രാർഥിക്കുവിൻ, വക്രതയും ദുഷ്ടതയുമുള്ള മനുഷ്യരിൽനിന്ന് ഞങ്ങൾ വിടുവിക്കപ്പെടേണ്ടതിനും പ്രാർഥിക്കുവിൻ; എന്തെന്നാൽ എല്ലാവരും വിശ്വാസികളല്ല. എന്നാൽ കർത്താവ് വിശ്വസ്തനാകുന്നു; അവിടുന്ന് നിങ്ങളെ ഉറപ്പിക്കുകയും ദുഷ്ടനിൽനിന്ന് കാത്തുസൂക്ഷിക്കുകയും ചെയ്യും. ഞങ്ങൾ കല്പിക്കുന്നത് നിങ്ങൾ ചെയ്യുന്നുവെന്നും ഇനിയും ചെയ്തുകൊണ്ടിരിക്കുമെന്നും കർത്താവിൽ ഞങ്ങൾക്ക് ഉറപ്പുണ്ട്. നമ്മുടെ പിതാവിന്റെ സ്നേഹത്തിലേക്കും ക്രിസ്തുവിന്റെ സഹനത്തിലേക്കും കർത്താവ് നിങ്ങളുടെ ഹൃദയങ്ങളെ നയിക്കുമാറാകട്ടെ.

അലസതയ്‌ക്കെതിരായ ഒരു മുന്നറിയിപ്പ്

സഹോദരീസഹോദരന്മാരേ, നമ്മുടെ കർത്താവായ യേശുക്രിസ്തുവിന്റെ നാമത്തിൽ ഞങ്ങൾ നിങ്ങളോടു കല്പിക്കുന്നു: നിങ്ങൾ ഞങ്ങളിൽനിന്നു പ്രാപിച്ച പാരമ്പര്യത്തിന് വിരുദ്ധമായി അലസതയിൽ ജീവിക്കുന്ന ഏതു സഹോദരനിൽനിന്നും അകന്നിരിക്കുവിൻ. ഞങ്ങളെ അനുകരിക്കേണ്ടത് എങ്ങനെയെന്ന് നിങ്ങൾതന്നെ അറിയുന്നുവല്ലോ; എന്തെന്നാൽ ഞങ്ങൾ നിങ്ങളുടെ ഇടയിൽ അലസരായിരുന്നില്ല. ഞങ്ങൾ ആരുടെയും ആഹാരം സൗജന്യമായി ഭക്ഷിച്ചില്ല; മറിച്ച്, നിങ്ങളിൽ ആർക്കും ഭാരമാകാതിരിക്കേണ്ടതിന് അധ്വാനത്തോടും കഷ്ടപ്പാടോടുംകൂടെ രാവും പകലും അധ്വാനിച്ചു. ഞങ്ങൾക്ക് അതിനുള്ള അവകാശമില്ലാഞ്ഞിട്ടല്ല, നിങ്ങൾ അനുകരിക്കേണ്ടതിന് ഞങ്ങളെത്തന്നെ ഒരു മാതൃകയാക്കേണ്ടതിനത്രേ. ഞങ്ങൾ നിങ്ങളോടുകൂടെ ആയിരുന്നപ്പോൾത്തന്നെ ഞങ്ങൾ നിങ്ങളോടു കല്പിച്ചു: ആരെങ്കിലും വേല ചെയ്യാൻ വിസമ്മതിച്ചാൽ അവൻ ഭക്ഷിക്കുകയും അരുത്. എന്തെന്നാൽ നിങ്ങളിൽ ചിലർ ഒരു വേലയിലും വ്യാപൃതരാകാതെ അലസതയിൽ ജീവിക്കുന്നുവെന്നും വ്യർഥകാര്യങ്ങളിൽ ഇടപെടുന്നുവെന്നും ഞങ്ങൾ കേൾക്കുന്നു. അങ്ങനെയുള്ളവരോട് കർത്താവായ യേശുക്രിസ്തുവിൽ ഞങ്ങൾ കല്പിക്കുകയും പ്രബോധിപ്പിക്കുകയും ചെയ്യുന്നു: ശാന്തതയോടെ വേല ചെയ്ത് സ്വന്തം അപ്പം ഭക്ഷിക്കുവിൻ. സഹോദരീസഹോദരന്മാരേ, നിങ്ങളോ നന്മ ചെയ്യുന്നതിൽ തളർന്നുപോകരുത്. ഈ ലേഖനത്തിലുള്ള ഞങ്ങളുടെ വചനം ആരെങ്കിലും അനുസരിക്കാതിരുന്നാൽ അവനെ അടയാളപ്പെടുത്തുവിൻ; അവന് ലജ്ജ തോന്നേണ്ടതിന് അവനോടു സഹവസിക്കുകയും അരുത്. എങ്കിലും അവനെ ശത്രുവായി കരുതരുത്, ഒരു സഹോദരനായി അവനെ ബുദ്ധിയുപദേശിക്കുവിൻ.

സമാധാനവും വന്ദനവും കൃപയും

സമാധാനത്തിന്റെ കർത്താവുതന്നെ എല്ലായ്‌പോഴും എല്ലാവിധത്തിലും നിങ്ങൾക്കു സമാധാനം നല്കുമാറാകട്ടെ. കർത്താവ് നിങ്ങളെല്ലാവരോടുംകൂടെ ഇരിക്കുമാറാകട്ടെ.

പൗലൊസായ ഞാൻ ഈ വന്ദനം എന്റെ സ്വന്തം കൈകൊണ്ട് എഴുതുന്നു—എന്നിൽനിന്നുള്ള ഏതു ലേഖനവും യഥാർഥമെന്നതിന്റെ അടയാളം ഇതാകുന്നു; ഇങ്ങനെയാണ് ഞാൻ എഴുതുന്നത്. നമ്മുടെ കർത്താവായ യേശുക്രിസ്തുവിന്റെ കൃപ നിങ്ങളെല്ലാവരോടുംകൂടെ ഇരിക്കുമാറാകട്ടെ.