دُعا وکړئ چې کلام په آزادۍ سره وګرځى
پولوس دعا غواړي چې کلام مخکې ورمنډه کړي، بيا يوې ستونزې ته ګرځي: په کليسا کې ځينو کار پرې ايښی، د نورو په چارو کې لاس وهي او د نورو پر غاړه ژوند کوي. هغه خپل د شپې او ورځې زيار ته اشاره کوي. داسې کس په نښه کړئ، ورسره مه ګډېږئ، خو د دښمن په توګه نه، بلکې د ورور په توګه يې خبردار کړئ.
3 1اے وروڼو او خوېندو، په آخر کښې دا چې زمونږ دپاره دُعا وکړئ چې زمونږ د مالِک عيسىٰ کلام په تيزۍ سره مخکښې ولاړ شى او د عزت وړ وګرځى، لکه څنګه چې ستاسو په مينځ کښې وګرځېدو، 2او دا چې مونږ له د بدکارو او شريرو خلقو نه خلاصى وملاويږى، ځکه چې هر څوک مؤمن نۀ دے. 3خو مالِک وفادار دے، چې تاسو ته به طاقت درکړى او د شرير نه به مو ساتى. 4مونږ په مالِک باندې اعتماد لرو چې تاسو هغه څۀ کوئ او به يې کوئ چې مونږ درته حُکم کوو. 5مالِک دې ستاسو زړونه د زمونږ پلار مينې او د مسيح صبر طرف ته ورهدايت کړى.
د سُستۍ په خلاف خبردارے
6اے وروڼو او خوېندو، زمونږ د مالِک عيسىٰ مسيح په نامه تاسو ته حُکم کوو چې هر هغه ورور نه لرې اوسئ چې په سُستۍ کښې ژوند کوى، د هغه رواياتو په خلاف چې تاسو زمونږ نه ترلاسه کړل. 7تاسو پخپله پوهېږئ چې تاسو له زمونږ پېروى کول پکار دى، ځکه چې مونږ ستاسو په مينځ کښې سُست نۀ وُو. 8مونږ د هيچا ډوډۍ وړيا ونۀ خوړله، بلکې مونږ شپه او ورځ، په محنت او مشقت سره کار کولو، دې دپاره چې په تاسو کښې په هيچا باندې بوجه نۀ شُو. 9دا نۀ چې مونږ اِختيار نۀ لرو، بلکې دې دپاره چې مونږ تاسو له د پېروۍ دپاره خپل ځان يو نمونه جوړ کړُو. 10کله چې مونږ ستاسو سره وُو، نو هم مو درته حُکم کړے وو چې کۀ څوک کار کول نۀ غواړى، نو هغۀ له ډوډۍ خوړل پکار نۀ دى. 11ځکه چې مونږ اورو چې ستاسو په مينځ کښې ځنې داسې دى چې په سُستۍ کښې ژوند کوى، په کار باندې نۀ بلکې په بېځايه خبرو مصروف دى. 12داسې خلقو ته مونږ د مالِک عيسىٰ مسيح په نامه حُکم کوو او زور ورکوو چې په خاموشۍ سره کار وکړى او خپله ډوډۍ وخورى. 13خو اے وروڼو او خوېندو، تاسو د نيکۍ کولو نه مۀ ستړى کېږئ. 14کۀ څوک زمونږ د دې خط د خبرې نافرمانى وکړى، نو هغه په نښه کړئ او د هغۀ سره مۀ ناسته پاسته کوئ، دې دپاره چې هغه شرمنده شى. 15خو هغه د دُښمن په شان مۀ ګڼئ، بلکې د ورور په شان ورته نصيحت وکړئ.
سلامتى، سلام او فضل
16د سلامتۍ مالِک دې پخپله تاسو له هر وخت، په هر طريقه سلامتى درکړى. مالِک دې له تاسو ټولو سره وى.
17زۀ، پولوس، دا سلام په خپل لاس ليکم دا هغه نښه ده چې زما د خوا هر خط اصلى دے؛ زۀ په دې طريقه ليکم. 18زمونږ د مالِک عيسىٰ مسيح فضل دې له تاسو ټولو سره وى.
