Kpee Ekpere ka Okwu ahụ Gbaa Ọsọ nʼEnweghị Mgbochi

Pọl rịọrọ ka e kpee ekpere ka okwu ahụ gbaa ọsọ gaa n'ihu, wee tụgharịa n'otu nsogbu: ụfọdụ n'ime nzukọ akwụsịla ịrụ ọrụ, ghọọ ndị na-etinye ọnụ n'ihe na-agbasaghị ha, na-eri n'ọsụsọ ndị ọzọ. O ji ndọgbu onwe ya n'ọrụ ehihie na abalị mere ihe atụ. Rịbanụ onye dị otú ahụ ama, unu na ya emekọla, ma dọọnụ ya aka ná ntị dị ka nwanna, ọ bụghị dị ka onye iro.

Isi 3.

Nʼikpeazụ, ụmụnna m, kpeeranụ anyị ekpere, ka okwu Onyenwe anyị Jisọs wee gbaa ọsọ gaa nʼihu ma bụrụ ihe a na-asọpụrụ, dịka ọ dị nʼetiti unu, nakwa ka a napụta anyị site nʼaka ndị mmadụ gbagọrọ agbagọ na ndị ọjọọ; nʼihi na ọ bụghị mmadụ niile bụ onye kwere ekwe. Ma Onyenwe anyị bụ onye kwesịrị ntụkwasị obi, onye ga-eme ka unu dị ike ma chebe unu site nʼaka ajọ onye ahụ. Anyị nwere ntụkwasị obi nʼOnyenwe anyị na unu na-eme, nakwa na unu ga-anọgide na-eme, ihe anyị nyere nʼiwu. Ka Onyenwe anyị duba obi unu nʼime ịhụnanya Nna anyị na nʼime ntachi obi nke Kraịst.

Ịdọ Aka na Ntị megide Umengwụ

Ụmụnna m, nʼaha Onyenwe anyị Jisọs Kraịst, anyị na-enye unu iwu, sị: wezụganụ onwe unu site nʼebe nwanna ọbụla na-ebi ndụ umengwụ nọ, nke na-emegide omenaala ahụ unu natara nʼaka anyị. Unu onwe unu maara na unu kwesịrị iṅomi anyị, ebe ọ bụ na anyị abụghị ndị umengwụ mgbe anyị nọ nʼetiti unu. Anyị erighị nri onye ọbụla nʼefu; kama anyị rụrụ ọrụ ehihie na abalị, nʼịdọgbu onwe anyị nʼọrụ na nʼahụhụ, ka anyị ghara ịbụ ibu arọ nye onye ọbụla nʼime unu. Ọ bụghị na anyị enweghị ikike, kama ka anyị mee onwe anyị ihe nlereanya nye unu ka unu ṅomie. Ọbụladị mgbe anyị nọnyeere unu, anyị nyere unu iwu, sị: ọ bụrụ na onye ọbụla ajụ ịrụ ọrụ, ya erila nri. Nʼihi na anyị na-anụ na ụfọdụ nʼetiti unu na-ebi ndụ umengwụ, ha anaghị arụsi ọrụ ike kama ha na-etinye ọnụ nʼihe na-agbasaghị ha. Anyị na-enye ndị dị otú a iwu ma na-adụ ha ọdụ nʼime Onyenwe anyị Jisọs Kraịst, sị: ka ha jiri nwayọọ rụọ ọrụ, rie naanị achịcha nke aka ha. Ma banyere unu, ụmụnna m, ike agwụla unu nʼime ime ezi ihe. Ọ bụrụ na onye ọbụla erubeghị isi nʼokwu anyị dị nʼakwụkwọ ozi a, debanụ ya aka, unu na ya ghara inwe mkpakọrịta, ka ihere wee mee ya. Ma unu ewerela ya dịka onye iro, kama dọọ ya aka na ntị dịka nwanna.

Udo, Ekele, na Amara

Ka Onyenwe udo nʼonwe ya nye unu udo mgbe niile, nʼụzọ niile. Ka Onyenwe anyị nọnyere unu niile.

Mụ, bụ Pọl, ji aka m dee ekele a—nke bụ akara na akwụkwọ ozi ọbụla si nʼaka m bụ nke eziokwu; otú a ka m si ede ihe. Ka amara nke Onyenwe anyị Jisọs Kraịst dịnyere unu niile.