Chong Rang pi To lang Hweiniyo
Paul na chong ga kama se inku lang ani lang hweini thang lang ngaiye, atiga katop khat la pi kale nge: rupkathan bi mi kasem na chwan to ding kanei thangluga, katei nun om khou se ongnu chwan katopnu nun ong rwe. Maanna baraanto om zingpha thamlai chwan ding cheksinne. Hadannu manpa ding theiga, bani le diga ong bacham mako, atiyeda munanu danga makka unao danga laak thangro.
3 1Kakham bi, unao rwan ga, nani lang bi tonu danga Pukraangba Jisu om chong ga pak inku thou lang khatle takung thang lang, ani lang hweini thang ngo, 2khatle kalenu khatle sa maknu mi nun kut pina ani ding kanthangnu to lang; balangbe mi bing khatchana balumsanu make. 3Atiyeda Pukraangba ga balumsa lang khopnuwe, Maanna nani ding pi nat thang lune khatle kasianu bina nani ding ngaak sian thang lune. 4Anina zathang pinu bing nga nanina to nge khatle to thou lune diga Pukraangba khou balumsaye. 5Pukraangba na nani lungning ding ani Pa om kriang bi khatle Christa om khaang theinu bi kai thang ding ngo.
Takaatnu Lang bi Cheksin Chong
6Unao rwan ga, Pukraangba Jisu Christa meng bina anina nani khou zathang pi rwe: anina nani khou pi thangnu chaang ding zei makka takaat lang bachunu unao mi bing le diga ong bacham mako. 7Nani nani bahakna ani ding sui bazei ding gaye dinu theiye, balangbe ani nani lang bi takaat make ngaake. 8Anina tudannu pakhat om thaisaak ding raza pi sa make; atiyeda nani lak pi tudannu pakhat ding potrit pi to thang mak lang, zingpha thamlai, chwan katop khatle riangre bi, anina chwan to rwe. 9Ani lang za make briakpina make atiyeda nanina sui bazei lang ani raantoza ding nani ding bazei zanu to lang nge. 10Ani nani le diga ong bacham ongnu kaan bi le, anina nani khou zathang pi ngaake: tudannu pakhatna chwan to lang nwam make dabe, maan sa za make. 11Balangbe nani lak pi kasemna takaat lang bachuwe, chwan bi siantong make atiyeda mi chorin choraiga chwan katopnu katap towe diga anina ngaisuwe. 12Hei dannu mi nun ding Pukraangba Jisu Christa khou anina zathang piga khatle hweinuwe: thiap thiapka chwan toga, baraanto om sa ding saro. 13Atiyeda nani ga, unao rwan ga, kasanu to lang bi riangre mako. 14Tudannu pakhatna heiba chamthwan bi ani chong ding ngai zei make dabe, maan ding ga thei thangluga, maan le diga ong bacham mako, hadanga maan kazak lang nge. 15Atiyeda maan ding ga munanu danga baning mako atiyeda unao khat danga maan ding ga sake pi ngo.
Dai Bazaangnu, Kalumnu khatle Phaangkriang
16Dai bazaangnu om Pukraangba Baraanto na bakaan bathin, balang bing bi, nani ding dai bazaangnu pi thang ding ngo. Pukraangba nani bing khou amnu to ding ngo.
17Kalumnu heiya Paul akutna hiaknuwe—akhouna hungnu chamthwan bing khatchana bazenuwe dinu badannu gaye; eina hei danga hiak ongme. 18Pukraangba Jisu Christa om phaangkriang nani bing khou amnu to ding ngo.