ምእንቲ እቲ ቓል ብናፅነት ክጐዪ ፀልዩ

ጳውሎስ ቃል ኣቐዲሙ ኽጐዪ ፀሎት ይልምን፤ ድሕሪኡ ናብ ሓደ ፀገም ይምለስ፦ ገሊኦም ኣብ ቤተ ክርስቲያን ስራሕ ሓዲጎም፥ ኣብ ነገር ካልኦት ዝኣትዉ ኾይኖም፥ ብናይ ካልኦት ይነብሩ። ነቲ ናይ ባዕሉ ለይትን መዓልትን ድኻም ይጠቅስ። ነቲ ኸምዙይ ዝበለ ኣስተብህሉሉ፥ ምስኡ ኣይትሕበሩ፥ ከም ፀላኢ ግና ኣይትቍፀርዎ፥ ከም ሓው ጌርኩም ደኣ ኣጠንቅቕዎ።

ምዕራፍ 3።

ኣብ መወዳእታ፥ ኣሕዋተይ፥ ቃል ጐይታና ኢየሱስ ከምቲ ኣባኻትኩም ዝኾነ፥ ክጐዪ ድማ ክኸብር፥ ምእንታና ፀልዩ፤ ካብ ጠዋያትን ክፉኣትን ሰባት ድማ ክንድሕን ፀልዩ፤ ኵሉ ሰብ ኣማኒ ኣይኮነን እሞ። ጐይታ ግና እሙን እዩ፤ ንሱ ኸዓ ከፅንዓኩምን ካብ እቲ ክፉእ ክሕልወኩምን እዩ። ነቲ ዝኣዘዝናኩም ትገብርዎ ኸም ዘለኹም፥ ገና ድማ ክትገብርዎ ኸም ዝኾንኩም፥ ብጐይታ ንተኣማመን ኣለና። ጐይታ ንልብኹም ናብ ፍቕሪ ኣቦናን ናብ ትዕግስቲ ክርስቶስን ይምራሕ።

ብዛዕባ ህኩይነት ዝወሃብ መጠንቀቕታ

ኣሕዋተይ፥ ብስም ጐይታና ኢየሱስ ክርስቶስ ከምዙይ ኢልና ንእዝዘኩም ኣለና፦ ካብ ነፍሲ ወከፍ ብህኩይነት ዝነብር፥ ነቲ ካባና ዝተቐበልኩምዎ ስርዓት ዘይስዕብ ሓው ረሓቑ። ንሕና ኣባኻትኩም ህኩያት ኣይኮንናን እሞ፥ ክትመስሉና ኸም ዝግብአኩም፥ ባዕልኻትኩም ትፈልጡ ኢኹም። ናይ ሓደ ሰብ እንጀራ እኳ ብናፃ ኣይበላዕናን፤ ንሓደ እኳ ኻባኻትኩም ከይነኽብድ ደኣ፥ ለይትን መዓልትን ብድኻምን መከራን ሰራሕና። መሰል ዝሰኣንና ኣይኮነን፤ ክትመስሉና ንባዕልትና ኣብነት ክንገብረልኩም ደኣ እምበር። ምሳኻትኩም እንተለና እኳ፥ “ዝኾነ ሰብ ክሰርሕ እንተ ኣበየ፥ ኣይብላዕ” ኢልና ኣዚዝናኩም ኔርና። ገሊኣቶም ካባኻትኩም ብስራሕ ዘይተሓዙ፥ ኣብ ነገር ካልኦት ዝኣትዉ ደኣ ኮይኖም፥ ብህኩይነት ከም ዝነብሩ ንሰምዕ ኣለና እሞ። ነዞም ከምዙይ ዝበሉ ሰባት፥ ስቕ ኢሎም ሰሪሖም ናይ ባዕሎም እንጀራ ክበልዑ፥ ብጐይታ ኢየሱስ ክርስቶስ ንእዝዞምን ንምዕዶምን ኣለና። ንስኻትኩም ግና ኣሕዋተይ፥ ፅቡቕ ኣብ ምግባር ኣይትሰልክዩ። ዝኾነ ሰብ ነቲ ኣብዛ መልእኽቲ ዝኾነ ቃልና እንተ ዘይተኣዘዘ፥ ምእንቲ ኽሓፍር፥ ኣስተብህሉሉ እሞ ምስኡ ኣይትሕበሩ። ግናኸ ከም ፀላኢ ኣይትቍፀርዎ፤ ከም ሓው ጌርኩም ደኣ ኣጠንቅቕዎ።

ሰላም፥ ሰላምታን ፀጋን

ባዕሉ እቲ ጐይታ ሰላም፥ ኵልሻዕ ብዅሉ መገዲ ሰላም ይሃብኩም። ጐይታ ምስ ኵላትኩም ይኹን።

ኣነ ጳውሎስ፥ ነዛ ሰላምታ እዚኣ ብናይ ባዕለይ ኢድ እፅሕፋ ኣለኹ፤ እዙይ ከዓ ነፍሲ ወከፍ ካባይ ዝኾነት መልእኽቲ ሓቀኛ ምዃና ዘመልክት ምልክት እዩ፤ ኣፅሓሕፋይ ከምዙይ እዩ። ፀጋ ጐይታና ኢየሱስ ክርስቶስ ምስ ኵላትኩም ይኹን።