2 ተሰሎንቄ 2

2 ¹ወንድሞች ሆይ፤ ስለ ጌታችን ኢየሱስ ክርስቶስ መምጣትና ወደ እርሱ ስለ መሰብሰባችን እንለምናችኋለን፤ ²የጌታችን ቀን አስቀድሞ እንደ ደረሰ በሚል በመንፈስ ቢሆን ወይም በንግግር ወይም ከእኛ የተላከ በሚመስል ደብዳቤ፣ በአእምሮአችሁ ፈጥናችሁ እንዳትናወጡ ወይም እንዳትደነግጡ፤ ³ማንም በማናቸውም መንገድ አያታልላችሁ፤ አስቀድሞ ዓመፅ ካልመጣና ለጥፋት የተፈረደበት የኀጢአት ሰው ካልተገለጠ በቀር ያ ቀን አይመጣም፤ ⁴እርሱም አምላክ ከተባለው ሁሉ ወይም ከሚመለከው ሁሉ በላይ ራሱን ከፍ ከፍ እያደረገ የሚቃወም ነው፤ ስለዚህ በአባታችን ቤተ መቅደስ ተቀምጦ ራሱን እግዚአብሔር ነኝ ብሎ ያውጃል። ^a a v4 እዚህ ‘እግዚአብሔር’ የሚለው በግልጥ የተተወው የዐመፀኛው ሰው ሐሰተኛና ራሱን ከፍ ከፍ የሚያደርግ ይገባኛል በመሆኑ ነው፤ ይኸውም እርሱ ራሱን በተቃውሞ ያቆመበት የአብ ሐሰተኛ ምትክ ነው። ⁵ገና ከእናንተ ጋራ ሳለሁ ይህን እነግራችሁ እንደ ነበር አታስታውሱምን? ⁶አሁንም አሁን የሚያግደውን ታውቃላችሁ፤ ይህም በራሱ ጊዜ ይገለጥ ዘንድ ነው። ⁷የዐመፅ ምስጢር አስቀድሞ እየሠራ ነውና፤ አሁን የሚያግደውም ከመንገድ እስኪወገድ ድረስ ብቻ ይቀጥላል። ⁸ከዚያም ዐመፀኛው ይገለጣል፤ እርሱንም ጌታ ኢየሱስ በአፉ እስትንፋስ ይጥለዋል፤ በመምጣቱም ብርሃን ያጠፋዋል። ⁹ዐመፀኛው በሰይጣን አሠራር፣ በሁሉም ኀይል፣ በሐሰተኛ ምልክቶችና በድንቅ ሥራዎች ይመጣል፤ ¹⁰ለሚጠፉትም በክፉ ማታለል ሁሉ ይመጣል፤ ይህም እውነትን ወደው ለመዳን ስላልፈቀዱ ነው። ¹¹ስለዚህ አባታችን ሐሰትን እንዲያምኑ ኀይለኛ የማታለል መንፈስ ይልክባቸዋል፤ ¹²ይህም እውነትን ያላመኑ ነገር ግን በክፋት ደስ የተሰኙ ሁሉ እንዲፈረድባቸው ነው።

በአብ ጥሪ ጸንታችሁ ቁሙ

¹³በጌታ የተወደዳችሁ ወንድሞች ሆይ፤ አባታችን በመንፈስ ቅዱስ መቀደስና እውነትን በማመን ለመዳን እንደ በኩራት ስለ መረጣችሁ፣ ስለ እናንተ ሁልጊዜ አባታችንን ልናመሰግን ይገባናል። ¹⁴የጌታችንን የኢየሱስ ክርስቶስን ክብር ታገኙ ዘንድ፣ በወንጌላችን በኩል ወደዚህ ጠራችሁ። ¹⁵እንግዲህ ወንድሞች ሆይ፤ ጽኑ፤ በቃላችን ቢሆን ወይም በደብዳቤያችን ያስተማርናችሁን ወግ ጠብቁ።

¹⁶ጌታችን ኢየሱስ ክርስቶስ ራሱ፣ የወደደንና በጸጋ የዘላለም መጽናናትንና በጎ ተስፋን የሰጠን አባታችንም፣ ¹⁷ልባችሁን ያጽናና፤ በበጎ ሥራና ቃል ሁሉም ያበርታችሁ።