2 ተሰሎንቄ 1

1 ¹ጳውሎስ፣ ሲልዋኖስና ጢሞቴዎስ፤ በአባታችንና በጌታ ኢየሱስ ክርስቶስ ላለችው ለተሰሎንቄ ሰዎች ቤተ ክርስቲያን፦ ²ከአባታችንና ከጌታ ኢየሱስ ክርስቶስ ጸጋና ሰላም ለእናንተ ይሁን።

እያደገ ስላለው እምነታችሁ ምስጋና

³ወንድሞችና እኅቶች ሆይ፤ ስለ እናንተ ሁልጊዜ አባታችንን ማመስገን ይገባናል፤ ይህም ተገቢ ነው፤ ምክንያቱም እምነታችሁ እጅግ እየጨመረ ስለሆነ፣ እያንዳንዳችሁም እርስ በርሳችሁ ያላችሁ ፍቅር ይበልጥ እያደገ ነው። ⁴ስለዚህ በምትታገሧቸው ስደቶችና መከራዎች ሁሉ ስለ ጽናታችሁና ስለ እምነታችሁ፣ እኛ ራሳችን በአባታችን አብያተ ክርስቲያናት መካከል ስለ እናንተ እንመካለን።

⁵ይህም የአባታችን ፍርድ ፍትሐዊ መሆኑ ማስረጃ ነው፤ ስለ እርስዋ መከራ የምትቀበሉላት ለአባታችን መንግሥት የተገባችሁ ሆናችሁ እንድትቈጠሩ ነውና። ⁶አባታችን ጻድቅ ስለሆነ፣ ለሚያስጨንቋችሁ ጭንቀትን ይመልስላቸዋል፤ ⁷ለተጨነቃችሁትም ለእናንተ ከእኛ ጋራ እረፍትን ይሰጣል፤ ይህም ጌታ ኢየሱስ ከኀያላን መላእክቱ ጋራ ከሰማይ በሚገለጥበት ጊዜ ነው፤ ⁸አባታችንን በማያውቁትና የጌታችንን የኢየሱስን ወንጌል በማይታዘዙት ላይ፣ በሚነድድ እሳት ፍርድን ያመጣል። ⁹ከጌታ ፊትና ከክብሩ ኀይል ርቀው፣ የዘላለም ጥፋት ቅጣትን ይቀበላሉ፤ ¹⁰ይህም በቅዱሳኑ ዘንድ ይከበር ዘንድ፣ ባመኑትም ሁሉ ዘንድ ይደነቅ ዘንድ በሚመጣበት በዚያ ቀን ይሆናል፤ ለእናንተ የሰጠነው ምስክርነት ታምኖበታልና።

¹¹ስለዚህም አባታችን ለጥሪው የተገባችሁ አድርጎ ይቈጥራችሁ ዘንድ፣ መልካምን ለማድረግ ያላችሁን ፍላጎት ሁሉና የእምነትን ሥራ በኀይሉ ይፈጽም ዘንድ፣ ሁልጊዜ ስለ እናንተ እንጸልያለን፤ ¹²ይህም የጌታችን የኢየሱስ ስም በእናንተ ዘንድ፣ እናንተም በእርሱ ዘንድ፣ በአባታችንና በጌታ ኢየሱስ ክርስቶስ ጸጋ ትከበሩ ዘንድ ነው።