Thesilanbü jungto salem ngüh
Bunyubou chalou shanga yoshaibü lashong to tükde naangkula sepeibü le che ki, hoba haoen to kümdaleila ngada.
1 1Ho le, Paul, Silvana hoba Timoti, seneibü Bou hoba Bunyubou Jisu Khrista ka kibü Thesilanbü lashong jungto: 2Seneibü Bou hoba Bunyubou Jisu Khrista ka onou hoba sangmai kan jungto yingshi.
Kaneibü mailem chingbü shanga thangtet
3Jaisinasi shuong, künei ponpen seneibü Bou la kan shanga nyensang kula ki, kho tükde ki, aishanga kaneibü mailem aei aei kiko chingda, hoba kan mütpem wekoei cheei che to sanoubü aei aei kida. 4Kheijinei kanei natbü shieikoebü hoba khonku pendoua kaneibü natenbü hoba mailem shanga, künei lolokei seneibü Bou lashong shuong yoa kan shanga the lenenda.
5Ho kho seneibü Bou ngühmai matjembü aukabü ki, aishanga kan seneibü Bou Sangle shanga mubü shuong wean chühkei, khübü shanga kankei khonkuda. 6Aishanga seneibü Bou ngühmaibü ki, kan to khonsaktibü shuong to haoei khonsak kungaila thüklabü, 7hoba kün yoan khonkubü kan to hakso kula thüklabü, ladang Bunyubou Jisu haoeibü hau yaangbü khuthük hangangbü shuong yoa khuthük ka tang khitan loulaje, 8wanlongbü wana, seneibü Bou angebü shuong thüka, hoba seneibü Bunyubou Jisu Ngühlang Maibü ngüh aditbü shuong thüka, haoei kayang kulabü. 9Haoen Bunyubou thedang hoba haoeibü soneikangbü hau ka bangan, ponpen leilubü kayang lotlabü, 10ho chaloua, haoei haoeibü saopobü shuong to soneikangko hoba mailembü pendou yoa maangdakbü lele loulaje—aishanga künei kan to kubü aukabü to kanei mailembei.
11Ho shanga, khei seneibü Bouei kan to haoeibü ngabü shanga mubü shuong wean chühla, hoba haoeibü hauei maibü shanga dambü pendou hoba mailem kümsilei loushedla shanga, künei ponpen kan shanga welauda. 12seneibü Bou hoba Bunyubou Jisu Khrista onou danko, seneibü Bunyubou Jisu nyen kan to, hoba kan hao to soneikangtilabü.
