Thessalonica manuh khan ke salam
Prabhu laga din bisoi te bhul bujha girja ke thik kori dibole aru taikhan ke mojbut thia thakibole matibole likha ekta pichete laga chithi.
1 1Paul, Silvanus, aru Timothy pora, amar Pitri aru Prabhu Jisu Khrista te thaka Thessalonica laga girja ke: 2Amar Pitri aru Prabhu Jisu Khrista pora tumikhan ke anugrah aru shanti hobi.
Tumikhan laga bagi thaka biswas nimite dhanyavad
3Bhai aru bhoini khan, tumikhan nimite amikhan hodai amar Pitri ke dhanyavad dibo lage—eneka kora thik ase—kilemane tumikhan laga biswas aru bisi bagi ahhi ase, aru tumikhan sob ekjon-ekjon nimite morom te aru bisi bagi ahhi ase. 4Etu nimite amikhan nijor amar Pitri laga girja khan majot tumikhan laga phutani kori ase, tumikhan pora sojai thaka sob tangona aru dukh te tumikhan laga dhorjo aru biswas nimite.
5Eitu amar Pitri laga dharmik bisar laga porman ase, tumikhan amar Pitri laga rajyo nimite layak ginti kori loise, jun nimite tumikhan bhi dukh pai ase. 6Amar Pitri dharmik ase karone, Tar pora tumikhan ke digdar diya khan ke digdar wapas dibo, 7aru dukh pai thaka tumikhan ke, amikhan logot, aram dibo, jitia Prabhu Jisu Tar sakti thaka sorgodoot khan logot sorgo pora prokax hobo, 8jolija aag te, amar Pitri ke najana khan aru amar Prabhu Jisu laga susamachar namana khan uporte nyay anibo. 9Tarkhan Prabhu laga samne pora aru Tar mahima laga sakti pora dur, ananta nosto laga sajai pabo, 10hei din te, jitia Tar pobitro manuh khan te mahima pabole aru biswas kora sob khan majot proshongsa pabole ahhibo—kilemane tumikhan ke amikhan laga gawahi tu biswas korise.
11Eitu nimite amikhan hodai tumikhan nimite prathana kori ase, titia amar Pitri pora tumikhan ke Tar mata nimite layak ginti koribo, aru Tar sakti pora bhal nimite sob itcha aru biswas laga kaam purah koribo, 12titia amar Prabhu Jisu laga nam tumikhan te mahima hobo, aru tumikhan Tar te, amar Pitri aru Prabhu Jisu Khrista laga anugrah pora.