2 Mga Taga-Tesalonica 1

1 ¹Si Pablo, si Silvano, ug si Timoteo, ngadto sa iglesia sa mga Tesalonica diha sa atong Amahan ug sa Ginoong Jesu-Cristo: ²Ang grasya maanaa kaninyo ug ang kalinaw gikan sa atong Amahan ug sa Ginoong Jesu-Cristo.

Mapasalamaton sa Nagtubo Ninyong Pagtuo

³Kinahanglan kanunay kaming magpasalamat sa atong Amahan tungod kaninyo, mga igsoon—ug angay lamang kini—kay ang inyong pagtuo nagatubo nga nagkadako, ug ang matag usa kaninyo nagatubo diha sa gugma alang sa usag usa. ⁴Busa kami gayod nagapasigarbo kaninyo taliwala sa mga iglesia sa atong Amahan, tungod sa inyong pagkamainantuson ug pagtuo sa tanang paglutos ug mga pag-antos nga inyong giantos.

⁵Kini maoy pamatuod sa matarong nga paghukom sa atong Amahan, nga giisip kamong takos sa gingharian sa atong Amahan, nga alang niini kamo nag-antos usab. ⁶Sanglit ang atong Amahan matarong, balosan niyag kasakit kadtong nagasakit kaninyo, ⁷ug sa paghatag ug kahupayan kaninyo nga nag-antos, kauban namo, inigpadayag sa Ginoong Jesus gikan sa langit uban sa iyang gamhanang mga anghel, ⁸diha sa nagadilaab nga kalayo, nga magadala ug hustisya ngadto sa mga wala makaila sa atong Amahan, ug sa mga wala magtuman sa ebanghelyo sa atong Ginoong Jesus. ⁹Pagaantuson nila ang silot sa walay kataposang kalaglagan, halayo sa presensya sa Ginoo ug sa iyang mahimayaong gahom, ¹⁰niadtong adlawa, sa iyang pag-anhi aron himayaon diha sa iyang mga balaan ug dayegon taliwala sa tanang mituo—kay ang among pagpamatuod kaninyo gituohan.

¹¹Tungod niini kami kanunay nag-ampo alang kaninyo, nga ang atong Amahan mag-isip kaninyong takos sa iyang pagtawag, ug tumanon pinaagi sa iyang gahom ang matag tinguha sa kaayohan ug buhat sa pagtuo, ¹²aron ang ngalan sa atong Ginoong Jesus mahimaya diha kaninyo, ug kamo diha kaniya, pinaagi sa grasya sa atong Amahan ug sa Ginoong Jesu-Cristo.