થેસ્સાલોનિકિઓને બીજો પત્ર 1 FHB Father's Heart Bible™

1 ¹પાઉલ, સિલ્વાનુસ તથા તિમોથી તરફથી, આપણા પિતા તથા પ્રભુ ઈસુ ખ્રિસ્તમાંની થેસ્સલોનિકીઓની મંડળીને: ²આપણા પિતા તથા પ્રભુ ઈસુ ખ્રિસ્ત તરફથી તમને કૃપા અને શાંતિ હો.

તમારા વધતા વિશ્વાસ માટે આભાર

³ભાઈઓ અને બહેનો, તમારે માટે આપણા પિતાનો આભાર અમારે સદા માનવો જોઈએ—એ યોગ્ય જ છે—કારણ, તમારો વિશ્વાસ વધારે ને વધારે વૃદ્ધિ પામે છે, અને તમારામાંનો દરેક એકબીજા પ્રત્યે પ્રેમમાં વધતો જાય છે. ⁴તેથી તમારાં સર્વ સતાવણીઓ તથા સંકટો જે તમે સહન કરો છો, તેમાં તમારી ધીરજ તથા વિશ્વાસને લીધે અમે પોતે આપણા પિતાની મંડળીઓમાં તમારે વિષે અભિમાન કરીએ છીએ.

⁵આ આપણા પિતાના ન્યાયી ચુકાદાનો પુરાવો છે, કે તમે આપણા પિતાના રાજને યોગ્ય ગણાઓ છો, જેને માટે તમે પણ દુઃખ સહન કરો છો. ⁶આપણા પિતા ન્યાયી છે, માટે જેઓ તમને સંકટ આપે છે, તેઓને તેઓ સંકટનો બદલો આપશે, ⁷અને જ્યારે પ્રભુ ઈસુ પોતાના પરાક્રમી દૂતો સાથે આકાશમાંથી પ્રગટ થશે, ત્યારે તમને, જેઓ દુઃખ સહન કરો છો, તેઓને અમારી સાથે આરામ આપશે, ⁸ભભૂકતી અગ્નિમાં, જેઓ આપણા પિતાને ઓળખતા નથી, અને જેઓ આપણા પ્રભુ ઈસુની સુવાર્તાને માનતા નથી, તેઓ પર ન્યાય લાવશે. ⁹તેઓ પ્રભુની હાજરીથી તથા તેમના મહિમાવંત પરાક્રમથી દૂર, સાર્વકાલિક વિનાશની શિક્ષા ભોગવશે, ¹⁰તે દિવસે, જ્યારે તેઓ પોતાના પવિત્ર લોકોમાં મહિમાવંત થવા, અને સર્વ વિશ્વાસીઓમાં પ્રશંસા પામવા આવશે—કારણ, તમારા પ્રત્યેની અમારી સાક્ષી માનવામાં આવી.

¹¹આ હેતુથી અમે તમારે માટે સદા પ્રાર્થના કરીએ છીએ, કે આપણા પિતા તમને પોતાના તેડાને યોગ્ય ગણે, અને ભલાઈની દરેક ઇચ્છા તથા વિશ્વાસના કાર્યને પોતાના પરાક્રમથી પૂર્ણ કરે, ¹²જેથી આપણા પિતા તથા પ્રભુ ઈસુ ખ્રિસ્તની કૃપાથી આપણા પ્રભુ ઈસુનું નામ તમારામાં મહિમાવંત થાય, અને તમે તેમનામાં.