2 Wathesalonike 1

1 ¹Paulo, Silvano, na Timotheo, kwa kanisa la Wathesalonike katika Baba yetu na Bwana Yesu Kristo: ²Neema na iwe kwenu na amani itokayo kwa Baba yetu na Bwana Yesu Kristo.

Kushukuru kwa Ajili ya Imani Yenu Inayokua

³Imetupasa kumshukuru Baba yetu daima kwa ajili yenu, ndugu zangu—na ni haki kufanya hivyo—kwa sababu imani yenu inazidi kukua zaidi na zaidi, na kila mmoja wenu anazidi kukua katika upendo kwa mwenzake. ⁴Hivyo sisi wenyewe twajivuna kwa ajili yenu miongoni mwa makanisa ya Baba yetu, kwa ustahimilivu wenu na imani katika mateso yote na dhiki mnazovumilia.

⁵Huu ni uthibitisho wa hukumu ya haki ya Baba yetu, kwamba mnahesabiwa kuwa mnastahili ufalme wa Baba yetu, ambao kwa ajili yake pia mnateseka. ⁶Kwa kuwa Baba yetu ni mwenye haki, atawalipa dhiki wale wanaowadhikisha ninyi, ⁷na kuwapa ninyi mnaoteseka faraja, pamoja nasi, wakati Bwana Yesu atakapofunuliwa kutoka mbinguni pamoja na malaika wa nguvu zake, ⁸katika mwali wa moto, akileta hukumu juu ya wale wasiomjua Baba yetu, na juu ya wale wasioitii injili ya Bwana wetu Yesu. ⁹Hao watapata adhabu ya maangamizi ya milele, wakitengwa mbali na uso wa Bwana na nguvu ya utukufu wake, ¹⁰katika siku ile, atakapokuja ili atukuzwe katika watakatifu wake na kustaajabiwa miongoni mwa wote walioamini—kwa sababu ushuhuda wetu kwenu uliaminiwa.

¹¹Kwa ajili hii twawaombea daima, ili Baba yetu awahesabu kuwa mnastahili wito wake, na kutimiza kwa nguvu zake kila shauku ya wema na kila kazi ya imani, ¹²ili jina la Bwana wetu Yesu litukuzwe ndani yenu, nanyi ndani yake, kwa neema ya Baba yetu na Bwana Yesu Kristo.