1 Wathesalonike 5

5 ¹Basi, kuhusu nyakati na majira, ndugu zangu, hamna haja ya kuandikiwa lolote. ²Kwa maana ninyi wenyewe mnajua vema sana ya kuwa siku ya Bwana wetu Yesu yaja kama mwivi ujapo usiku. ³Watu watakaposema, "Kuna amani na salama," ndipo uharibifu wa ghafula utakapowajia—kama utungu wa kuzaa umjiavyo mwanamke mwenye mimba—wala hawataokoka. ⁴Lakini ninyi, ndugu zangu, hammo gizani hata siku ile iwakute kama mwivi. ⁵Ninyi nyote ni watoto wa nuru na watoto wa mchana; sisi si wa usiku wala wa giza. ⁶Basi tusilale usingizi kama wengine, bali tukeshe na tuwe na kiasi. ⁷Kwa maana walalao usingizi hulala usiku, nao walevi hulewa usiku. ⁸Lakini sisi kwa kuwa tu wa mchana, tuwe na kiasi, hali tumejivika imani na upendo kama dirii ya kifuani, na tumaini la wokovu kama chapeo. ⁹Kwa maana Baba yetu hakutuweka kwa ajili ya ghadhabu, bali tuupate wokovu kwa njia ya Bwana wetu Yesu Kristo, ¹⁰aliyekufa kwa ajili yetu, ili kwamba, tukiwa macho au tumelala, tuishi pamoja naye. ¹¹Kwa sababu hiyo farijianeni, na kujengana kila mmoja na mwenzake, kama vile mnavyofanya.

Kuishi kama Watoto wa Nuru

¹²Nasi twawasihi, ndugu zangu, wajueni wale wanaojitaabisha kwa bidii kati yenu, na kuwaongoza katika Bwana, na kuwaonya. ¹³Waheshimuni sana kwa upendo kwa ajili ya kazi yao. Iweni na amani ninyi kwa ninyi.

¹⁴Ndugu zangu, twawausia: waonyeni walio wavivu, watieni moyo waliokata tamaa, wasaidieni walio dhaifu, vumilieni na watu wote. ¹⁵Angalieni mtu asimlipe mwenzake baya kwa baya, bali siku zote fuatilieni lililo jema, ninyi kwa ninyi na kwa watu wote.

¹⁶Furahini siku zote, ¹⁷ombeni bila kukoma, ¹⁸shukuruni kwa kila jambo; kwa maana hayo ndiyo mapenzi ya Baba yetu kwenu katika Kristo Yesu. ¹⁹Msimzimishe Roho Mtakatifu. ²⁰Msizidharau unabii, ²¹bali jaribuni kila kitu; lishikeni lililo jema. ²²Jiepusheni na kila namna ya uovu.

²³Baba yetu wa amani mwenyewe awatakase kabisa kabisa, na roho zenu na nafsi zenu na miili yenu ihifadhiwe bila lawama, wakati wa kuja kwake Bwana wetu Yesu Kristo. ²⁴Yeye anayewaita ni mwaminifu, naye hakika atalitimiza hilo.

²⁵Ndugu zangu, tuombeeni.

²⁶Wasalimuni ndugu wote kwa busu takatifu. ²⁷Nawasihi mbele za Bwana kwamba waraka huu wasomewe ndugu wote.

²⁸Neema ya Bwana wetu Yesu Kristo iwe pamoja nanyi.