1 Thessalonicanao 5

5 ¹Ara atam kala angarit chiwui pongli, ivānaobing, nathumli kapi khavai darkar masāmana. ²Ithumwui Proho Jishuwui zimiksho chi ngayāli khale thada latrāra kaji nathum khalattana mashungmeida thei. ³Mibingna "Chingri kala tāphup kahai" da hāng tharan, nao khavai sha̱naoli naokhara̱wui kachot thāda, kashuirak eina sāshimān chi athumli yuira. Kala athum mayāmshokmara. ⁴Kha ivānaobing, chithang chi khale thada nathumli mayuirarmara khavai, nathum tangkhamangli maleimana. ⁵Nathum saikora kahorwui naongarā kala ngashunwui naongarāna; ithum ngayāwui kala tangkhamangwui maningmana. ⁶Chieina, ithum kateibing thada mapisa, kha ningngasharda mikringda pamsa. ⁷Kaja kapibing chi ngayāli piya, kala khamaripbing chi ngayāli maripa. ⁸Kha ithum ngashunwui naongarāna. Chiwui vang shitkasang kala leikashi chi thikkom sāda, kala huikhamiwui kachihān chi kuihon thada ngahonda, ithumna mikringda pamsa. ⁹Kaja ithumwui Avāna ithumli malungkhavātwui vang ngarānping maningmana, kha huikhami chi ithumwui Proho Jishu Khristawui mangā eina samphang khavaina. ¹⁰Ana ithumwui vang thihaira, chieina mathukla piya, ithum ali ngasoda ringrumra. ¹¹Chiwui vang eina nathumna ara sā thada, akha eina akha kasatsang ngaroklu kala akha eina akha mataisang ngaroklu.

Kahorwui Naongarā Thada Ring

¹²Ivānaobing, ithumna nathumli kapona, nathumwui lungli panglāk eina ot kasā, Proholi nathumli thānmi, kala nathumli hāngmachinbing chili khayāshilu. ¹³Athumwui otwui vang leikashi eina athumli mataimeida khayāshilu. Akha eina akha chingri eina okthuirumlu.

¹⁴Ivānaobing, ithumna nathumli kapona: ngachāng makakābingli hāngmachinlu, ning suitāhaibingli ninglum ngasaklu, makathukbingli pangngasaklu, saikorali khāngtheilu. ¹⁵Ningngasharlu, khipānakha khangateili makaphāwui vang makaphā mahanmiranu, kha atam kachida akha eina akha kala saikorawui vang kaphā chi shurlu.

¹⁶Atam kachida ringphāchinglu, ¹⁷khangasām mavaila seihā sāchinglu, ¹⁸Ot saikorali ningkashi milu; kaja hi Khrista Jishuli nathumwui vang ithumwui Avāwui kaphaningna. ¹⁹Manglā Katharali mashimitalu. ²⁰Khamarānli ningkachaida masaalu, ²¹kha ot saikora chāng yanglu; kaphā chi singtitmalu. ²²Morei yur saikorali mangasoalu.

²³Chingri kahaiwui ithumwui Avā a khalattana nathumli ningtongda kathara ngasakranu; kala ithumwui Proho Jishu Khrista kharā tharan, nathumwui manglā, wuklung kala phasā saikora shāt makālak eina mayon ngasakranu. ²⁴Nathumli hokakhui kahai chi shitsangkapaiyana; ana chi mashoila ungshung ngasakra.

²⁵Ivānaobing, ithumwui vang seihā sāmilu.

²⁶Ivānao saikorali kathara khamaya̱ eina shālam milu. ²⁷Chithi hi ivānao saikorali pāchithei khavai, Prohowui miktāli ina nathumli kakasona.

²⁸Ithumwui Proho Jishu Khristawui lukhamashan nathumli ngasomiranu.