د مالِک ورځ راځى
هغه ورځ لکه غل راځي، خو هغوی په دې اړه په تیاره کې نه دي، نو ویښ او هوښیار اوسئ. پای یوه چټکه لړۍ ده: د خپلو مشرانو درناوی وکړئ، زړه تنګو ته تسلي ورکړئ، صبر وکړئ، خوشحاله اوسئ، دعا وکړئ، شکر وباسئ، هر څه وازمویئ، او په هغه څه ټینګ ونیسئ چې ښه دي.
5 1اوس، اے وروڼو او خوېندو، د وختونو او زمانو په حقله تاسو ته د ليکلو هيڅ ضرورت نشته. 2تاسو پخپله ښۀ پوهېږئ چې زمونږ د مالِک عيسىٰ ورځ به داسې راشى لکه څنګه چې غل په شپه کښې راځى. 3کله چې خلق وائى چې، ”سلامتى او امن دے،“ نو ناڅاپه به پرې تباهى راشى، لکه څنګه چې په حامله ښځه باندې د زېږون درد راځى، او هغوئ به بچ نۀ شى. 4خو اے وروڼو او خوېندو، تاسو په تيارۀ کښې نۀ ياست چې هغه ورځ دې پر تاسو د غل په شان ناببره راشى. 5تاسو ټول د رڼا بچى او د ورځې بچى ياست؛ مونږ نۀ د شپې يُو او نۀ د تيارۀ. 6نو بيا، راځئ چې د نورو په شان ويده نۀ شُو، بلکې ويښ او هوښيار پاتې شُو. 7ځکه چې څوک چې ويده کيږى، هغوئ په شپه کښې ويده کيږى، او څوک چې نشه کوى، هغوئ په شپه کښې نشه کوى. 8خو چونکې مونږ د ورځې يُو، نو راځئ چې هوښيار اوسُو، او د سينې د زغرې په شان ايمان او مينه واغوندُو، او د خلاصون اُميد د خولۍ په شان. 9ځکه چې زمونږ پلار مونږ د قهر دپاره نۀ يُو ټاکلى، بلکې دې دپاره چې زمونږ د مالِک عيسىٰ مسيح په وسيله خلاصون ومومُو، 10هغه چې زمونږ دپاره مړ شو، دې دپاره چې کۀ ويښ يُو او کۀ ويده، مونږ د هغۀ سره يو ځائ ژوندون وکړُو. 11نو ځکه يو بل ته حوصله ورکوئ او يو بل جوړوئ، لکه څنګه چې تاسو کوئ.
د رڼا د بچو په شان ژوند کول
12اے وروڼو او خوېندو، مونږ تاسو نه غوښتنه کوُو چې کوم کسان ستاسو په مينځ کښې سخت محنت کوى، او په مالِک کښې ستاسو مشرى کوى او تاسو ته نصيحت کوى، د هغوئ عزت وکړئ. 13د هغوئ د کار په وجه د مينې سره د هغوئ ډېر زيات درناوے وکړئ. يو بل سره په سلامتۍ کښې ژوند وکړئ.
14اے وروڼو او خوېندو، مونږ تاسو ته نصيحت کوُو چې، سُست کسانو ته نصيحت وکړئ، بېزړو ته تسلى ورکړئ، کمزورو سره مدد وکړئ، او د ټولو سره صبر وکړئ. 15خيال ساتئ چې هيڅوک د بدۍ بدله په بدۍ سره هيچا ته ورنۀ کړى، بلکې تل د يو بل او د ټولو دپاره د نيکۍ طلبګار اوسئ.
16تل خوشحالى کوئ، 17بغير له کوم ودانه دُعا کوئ، 18په هر څۀ کښې شکر ادا کوئ؛ ځکه چې ستاسو په حق کښې په عيسىٰ مسيح کښې د زمونږ پلار رضا دا ده. 19روحُ القُدس مۀ مړ کوئ. 20د پېشګويانو سپکاوے مۀ کوئ، 21بلکې هر څۀ وازمائئ؛ څۀ چې ښۀ وى هغه ټينګ ونيسئ. 22د هر قسم بدۍ نه ليرې اوسئ.
23د سلامتۍ زمونږ پلار دې پخپله تاسو ته بالکُل پاکوالے درکړى، او ستاسو ټول روح، نفس او بدن دې زمونږ د مالِک عيسىٰ مسيح په راتلو کښې بېګناه وساتلے شى. 24هغه چې تاسو بلى، وفادار دے؛ هغه به دا خامخا پوره کړى.
25اے وروڼو او خوېندو، زمونږ دپاره دُعا کوئ.
26ټولو وروڼو او خوېندو ته د پاک مچ سره سلام ووايئ. 27زۀ تاسو ته د مالِک په حضور کښې حُکم کوم چې دا خط ټولو وروڼو او خوېندو ته واورولے شى.
28زمونږ د مالِک عيسىٰ مسيح فضل دې ستاسو سره وى.
