帖撒羅尼迦前書 5

5 ¹弟兄姊妹啊,講到時候同日期,唔使寫俾你哋知。 ²你哋自己好清楚,我哋主耶穌嘅日子,就好似夜晚嘅賊咁嚟到。 ³當人講「太平穩妥」嘅時候,災禍就突然臨到佢哋,好似陣痛臨到懷孕嘅婦人一樣,佢哋一定走唔甩。 ⁴但係弟兄姊妹啊,你哋唔係處喺黑暗之中,以致嗰日好似賊咁突然嚟到嚇親你哋。 ⁵你哋全部都係光明嘅兒女,係白晝嘅兒女;我哋唔屬於黑夜,亦都唔屬於黑暗。 ⁶咁樣,我哋就唔好好似其他人咁瞓覺,倒不如警醒,頭腦清醒。 ⁷因為瞓覺嘅人喺夜晚瞓,飲醉嘅人喺夜晚醉。 ⁸但係我哋既然屬於白晝,就應該頭腦清醒,以信心同愛心作護心鏡甲,以得救嘅盼望作頭盔。 ⁹因為我哋嘅父唔係預定我哋去受憤怒嘅刑罰,而係要我哋藉住我哋主耶穌基督得到救恩, ¹⁰佢為咗我哋死,叫我哋無論醒住定係瞓咗,都可以同佢一齊活。 ¹¹所以,你哋要彼此勸勉,互相建立,好似你哋而家所做嘅一樣。

活得好似光明嘅兒女

¹²弟兄姊妹啊,我哋求你哋敬重嗰啲喺你哋當中辛勞、喺主裡面帶領你哋、又勸戒你哋嘅人。 ¹³又要因為佢哋嘅工作,用愛心格外尊重佢哋。你哋要彼此和睦相處。

¹⁴弟兄姊妹啊,我哋勸你哋:要勸戒遊手好閒嘅人,安慰灰心嘅人,扶助軟弱嘅人,又要對眾人有耐性。 ¹⁵你哋要謹慎,唔好有人以惡報惡,倒不如無論對彼此定係對眾人,都常常追求良善。

¹⁶你哋要常常喜樂, ¹⁷不住咁禱告, ¹⁸凡事都要謝恩;因為呢個就係我哋嘅父喺基督耶穌裡面向你哋所定嘅旨意。 ¹⁹唔好熄滅聖靈。 ²⁰唔好藐視先知嘅預言, ²¹凡事都要察驗;好嘅就要持守。 ²²各樣嘅惡事都要遠離。

²³願賜平安嘅我哋嘅父,親自使你哋完全成聖;又願你哋嘅靈、魂、體全然蒙保守,喺我哋主耶穌基督嚟到嘅時候,無可指摘。 ²⁴呼召你哋嘅那位係信實嘅,佢必定會成就呢件事。

²⁵弟兄姊妹啊,請你哋為我哋禱告。

²⁶你哋要用聖潔嘅親嘴問候眾弟兄姊妹。 ²⁷我喺主面前囑咐你哋,要將呢封信讀俾眾弟兄姊妹聽。

²⁸願我哋主耶穌基督嘅恩惠同你哋同在。