1 تھسلنیکیوں 5

5 ¹اب اے بھائیو اور بہنو، وقتوں اور موسموں کے بارے میں تمہیں کچھ لکھنے کی ضرورت نہیں۔ ²کیونکہ تم خود خوب جانتے ہو کہ ہمارے خُداوند یسوع کا دن اُسی طرح آئے گا جس طرح رات کو چور آتا ہے۔ ³جب لوگ کہیں گے، ”امن اور سلامتی ہے،“ تو اُن پر اچانک ہلاکت آ پڑے گی—جیسے حاملہ عورت پر دردِ زہ—اور وہ ہرگز نہ بچ سکیں گے۔ ⁴لیکن اے بھائیو اور بہنو، تم اندھیرے میں نہیں ہو کہ وہ دن چور کی طرح تم پر آ پڑے۔ ⁵تم سب نور کے فرزند اور دن کے فرزند ہو؛ ہم نہ رات کے ہیں نہ اندھیرے کے۔ ⁶پس آؤ ہم باقی لوگوں کی طرح سوتے نہ رہیں، بلکہ جاگتے اور ہوشیار رہیں۔ ⁷کیونکہ جو سوتے ہیں وہ رات ہی کو سوتے ہیں، اور جو متوالے ہوتے ہیں وہ رات ہی کو متوالے ہوتے ہیں۔ ⁸مگر چونکہ ہم دن کے ہیں، اِس لیے آؤ ہم ہوشیار رہیں، اور ایمان اور محبت کا بکتر پہنیں، اور نجات کی اُمید کا خود۔ ⁹کیونکہ ہمارے باپ نے ہمیں غضب کے لیے نہیں، بلکہ اِس لیے مقرر کیا کہ ہم اپنے خُداوند یسوع مسیح کے وسیلے سے نجات حاصل کریں، ¹⁰جو ہمارے لیے مؤا، تاکہ ہم جاگتے ہوں یا سوتے، اُس کے ساتھ جیئیں۔ ¹¹پس ایک دوسرے کو تسلی دو اور ایک دوسرے کی ترقی کرو، جیسا کہ تم کرتے بھی ہو۔

نور کے فرزندوں کی مانند زندگی

¹²اب اے بھائیو اور بہنو، ہم تم سے درخواست کرتے ہیں کہ جو تمہارے درمیان محنت کرتے ہیں، اور خُداوند میں تمہاری پیشوائی کرتے ہیں، اور تمہیں نصیحت کرتے ہیں، اُن کی قدر کرو۔ ¹³اُن کے کام کے سبب سے محبت کے ساتھ اُن کی بہت ہی عزت کرو۔ آپس میں میل ملاپ سے رہو۔

¹⁴اے بھائیو اور بہنو، ہم تمہیں نصیحت کرتے ہیں: بے قاعدہ چلنے والوں کو سمجھاؤ، بے دِلوں کو دلاسا دو، کمزوروں کو سنبھالو، سب کے ساتھ تحمل سے پیش آؤ۔ ¹⁵خبردار، کوئی کسی سے بدی کے بدلے بدی نہ کرے، بلکہ ہمیشہ ایک دوسرے کے اور سب کے ساتھ بھلائی کے طالب رہو۔

¹⁶ہمیشہ خوش رہو، ¹⁷بلا ناغہ دعا کرو، ¹⁸ہر بات میں شکر کرو؛ کیونکہ تمہارے حق میں مسیح یسوع میں ہمارے باپ کی یہی مرضی ہے۔ ¹⁹رُوحُ القُدس کو نہ بجھاؤ۔ ²⁰نبوّتوں کو حقیر نہ جانو، ²¹بلکہ سب باتوں کو آزماؤ؛ جو اچھی ہو اُسے تھامے رہو۔ ²²ہر قِسم کی بدی سے دُور رہو۔

²³اب سلامتی کا ہمارا باپ خود تمہیں بالکل پاک کرے، اور تمہاری رُوح اور جان اور بدن ہمارے خُداوند یسوع مسیح کے آنے تک پورے طور پر بے عیب محفوظ رکھے جائیں۔ ²⁴جو تمہیں بلاتا ہے وہ وفادار ہے؛ وہ ضرور ایسا ہی کرے گا۔

²⁵اے بھائیو اور بہنو، ہمارے لیے دعا کرو۔

²⁶سب بھائیوں اور بہنوں کو پاک بوسے سے سلام کہو۔ ²⁷میں تمہیں خُداوند کی قسم دیتا ہوں کہ یہ خط سب بھائیوں اور بہنوں کو پڑھ کر سنایا جائے۔

²⁸ہمارے خُداوند یسوع مسیح کا فضل تمہارے ساتھ ہوتا رہے۔