1 ተሰሎንቄ 5

5 ¹ወንድሞችና እኀቶች ሆይ፤ ስለ ዘመናትና ስለ ወቅቶች የሚጻፍላችሁ ነገር አያስፈልጋችሁም። ²የጌታችን የኢየሱስ ቀን ሌሊት እንደሚመጣ ሌባ እንደሚመጣ እናንተ ራሳችሁ በሚገባ ታውቃላችሁ። ³ሰዎች፣ “ሰላምና ደኅንነት” ባሉ ጊዜ፣ ፅንስ እንደያዘች ሴት ምጥ፣ ድንገተኛ ጥፋት ይደርስባቸዋል፤ ከቶም አያመልጡም። ⁴እናንተ ግን ወንድሞችና እኀቶች ሆይ፤ ያ ቀን እንደ ሌባ ድንገት እንዲደርስባችሁ በጨለማ ውስጥ አይደላችሁም። ⁵እናንተ ሁላችሁ የብርሃን ልጆችና የቀን ልጆች ናችሁ፤ እኛ የሌሊትም ሆነ የጨለማ አይደለንም። ⁶እንግዲህ እንደ ሌሎች አንተኛ፤ ነገር ግን ነቅተንና ነጥረን እንኑር። ⁷የሚተኙ ሌሊት ይተኛሉና፤ የሚሰክሩም ሌሊት ይሰክራሉ። ⁸እኛ ግን የቀን ስለ ሆንን፣ እምነትንና ፍቅርን እንደ ጥሩር፣ የድነትን ተስፋ እንደ ራስ ቍር ለብሰን እንንቃ። ⁹አባታችን ለቍጣ አልመደበንም፤ ነገር ግን በጌታችን በኢየሱስ ክርስቶስ በኩል ድነትን እንድናገኝ ነው እንጂ፤ ¹⁰እርሱም ነቅተንም ሆነ ተኝተን ከእርሱ ጋራ አብረን በሕይወት እንድንኖር ስለ እኛ ሞተ። ¹¹ስለዚህ አሁን እንደምታደርጉት እርስ በርሳችሁ ተበረታቱ፤ አንዳችሁም ሌላውን ገንቡ።

እንደ ብርሃን ልጆች መኖር

¹²ወንድሞችና እኀቶች ሆይ፤ በመካከላችሁ የሚደክሙትን፣ በጌታ የሚመሯችሁንና የሚገሥጿችሁን እንድታከብሩ እንለምናችኋለን። ¹³ስለ ሥራቸው በፍቅር እጅግ ከፍ አድርጋችሁ አክብሯቸው። እርስ በርሳችሁም በሰላም ኑሩ።

¹⁴ወንድሞችና እኀቶች ሆይ፤ የማይሠሩትን እንድትገሥጹ፣ የተስፋ ቍርጥ የሆኑትን እንድታጽናኑ፣ ደካሞችን እንድትደግፉ፣ ለሁሉም እንድትታገሡ እናሳስባችኋለን። ¹⁵ማንም ለማንም ክፉን በክፉ እንዳይመልስ ተጠንቀቁ፤ ነገር ግን ሁልጊዜ እርስ በርሳችሁና ለሁሉም መልካሙን ተከታተሉ።

¹⁶ዘወትር ደስ ይበላችሁ፤ ¹⁷ሳታቋርጡ ጸልዩ፤ ¹⁸በሁሉም ነገር አመስግኑ፤ ይህ ለእናንተ በክርስቶስ ኢየሱስ ያለው የአባታችን ፈቃድ ነውና። ¹⁹መንፈስ ቅዱስን አታጥፉ። ²⁰ትንቢቶችን አትናቁ፤ ²¹ነገር ግን ሁሉን መርምሩ፤ መልካሙን ያዙ። ²²ከክፋት ዐይነት ሁሉ ራቁ።

²³የሰላም አባታችን ራሱ ፈጽሞ ይቀድሳችሁ፤ መንፈሳችሁና ነፍሳችሁ ሥጋችሁም ሁሉ በጌታችን በኢየሱስ ክርስቶስ መምጣት ነቀፋ የሌለበት ሆኖ ይጠበቅ። ²⁴የሚጠራችሁ ታማኝ ነው፤ እርሱም ይህን በእርግጥ ይፈጽማል።

²⁵ወንድሞችና እኀቶች ሆይ፤ ስለ እኛ ጸልዩ።

²⁶ወንድሞችንና እኀቶችን ሁሉ በተቀደሰ አሳሳም ሰላምታ ስጡ። ²⁷ይህች መልእክት ለወንድሞችና ለእኀቶች ሁሉ እንድትነበብ በጌታ ፊት አዛችኋለሁ።

²⁸የጌታችን የኢየሱስ ክርስቶስ ጸጋ ከእናንተ ጋራ ይሁን።