१ थेस्सलनीकाकरांस 5

5 ¹ आता, बंधुभगिनींनो, काळ आणि समयांविषयी तुम्हांला काही लिहिण्याची गरज नाही. ² कारण रात्री चोर येतो तसा आपल्या प्रभु येशूचा दिवस येतो, हे तुम्ही स्वतः चांगले जाणता. ³ जेव्हा लोक म्हणतील, “शांती आणि सुरक्षितता,” तेव्हा गरोदर स्त्रीला प्रसववेदना येतात तसा त्यांच्यावर अचानक नाश येईल, आणि ते सुटणार नाहीत. ⁴ पण बंधुभगिनींनो, तो दिवस चोरासारखा तुम्हांला अकस्मात गाठावा, असे तुम्ही अंधारात नाही. ⁵ तुम्ही सर्व प्रकाशाची व दिवसाची मुले आहात; आपण रात्रीचे किंवा अंधाराचे नाही. ⁶ म्हणून, इतरांसारखे आपण झोपू नये, तर जागृत व सावध राहावे. ⁷ कारण जे झोपतात ते रात्री झोपतात, आणि जे धुंद होतात ते रात्री धुंद होतात. ⁸ पण आपण दिवसाचे असल्यामुळे, विश्वास व प्रीती हे उरस्त्राण आणि तारणाची आशा हे शिरस्त्राण घालून सावध राहू या. ⁹ कारण आमच्या पित्याने आपल्याला क्रोधासाठी नव्हे, तर आपल्या प्रभु येशू ख्रिस्ताद्वारे तारण मिळवण्यासाठी नेमले आहे. ¹⁰ तो आपल्यासाठी मरण पावला, यासाठी की आपण जागे असू किंवा झोपलेले असू, आपण त्याच्यासोबत जगावे. ¹¹ म्हणून, तुम्ही जसे करत आहात तसेच एकमेकांना उत्तेजन द्या व एकमेकांची उन्नती करा.

प्रकाशाची मुले म्हणून जगणे

¹² बंधुभगिनींनो, आम्ही तुम्हांला विनंती करतो की, जे तुमच्यामध्ये कष्ट करतात, प्रभूमध्ये तुम्हांला मार्गदर्शन करतात व तुम्हांला बोध करतात, त्यांचा आदर करा; ¹³ त्यांच्या कामासाठी प्रीतीने त्यांना अत्यंत मान द्या. एकमेकांशी शांतीने राहा.

¹⁴ बंधुभगिनींनो, आम्ही तुम्हांला आग्रह करतो: आळशांना बोध करा, निराश झालेल्यांना धीर द्या, दुर्बलांना आधार द्या, सर्वांशी सहनशील राहा. ¹⁵ पाहा, कोणीही कोणाची वाईटाबद्दल वाईट फेड करू नये, तर एकमेकांचे व सर्वांचे नेहमी बरे व्हावे म्हणून झटा.

¹⁶ सदैव आनंद करा, ¹⁷ प्रार्थना करण्याचे कधीही थांबवू नका, ¹⁸ प्रत्येक गोष्टीत उपकारस्तुती करा; कारण ख्रिस्त येशूमध्ये तुमच्याविषयी आमच्या पित्याची हीच इच्छा आहे. ¹⁹ पवित्र आत्म्याला विझवू नका. ²⁰ भविष्यवाण्यांना तुच्छ मानू नका, ²¹ तर सर्व गोष्टींची परीक्षा करा; जे चांगले ते धरून ठेवा. ²² प्रत्येक प्रकारच्या वाईटापासून दूर राहा.

²³ शांतीचा आमचा पिता स्वतः तुम्हांला पूर्णपणे पवित्र करो, आणि आपल्या प्रभु येशू ख्रिस्ताच्या येण्याच्या वेळी तुमचा संपूर्ण आत्मा, जीव व शरीर निर्दोष राखले जावो. ²⁴ जो तुम्हांला बोलावतो तो विश्वासू आहे; तो हे खचित घडवून आणील.

²⁵ बंधुभगिनींनो, आमच्यासाठी प्रार्थना करा.

²⁶ सर्व बंधुभगिनींना पवित्र चुंबनाने सलाम करा. ²⁷ हे पत्र सर्व बंधुभगिनींना वाचून दाखवावे, अशी मी तुम्हांला प्रभूसमोर आज्ञा करतो.

²⁸ आपल्या प्रभु येशू ख्रिस्ताची कृपा तुमच्याबरोबर असो.