Ranar Ubangiji Tana Zuwa

Ranar tana zuwa kamar ɓarawo, amma su ba a cikin duhu suke game da ita ba, saboda haka su zauna a faɗake da natsuwar hankali. Ƙarshen jeri ne mai sauri: ku girmama shugabanninku, ku ƙarfafa masu karaya, ku yi haƙuri, ku yi farin ciki, ku yi addu'a, ku yi godiya, ku gwada kome, ku riƙe abin da yake nagari.

Babi na 5.

Game da lokuta da zamanu kuwa, 'yan'uwa, ba kwa bukatar a rubuta muku kome. Ku kanku kun sani sarai cewa ranar Ubangijinmu Yesu za ta zo kamar barawo da dare. Sa'ad da mutane suke cewa, “Salama da zaman lafiya,” sai halaka ta auko musu farat ɗaya—kamar naƙudar haihuwa ga mace mai ciki—ba kuwa za su tsere ba. Amma ku, 'yan'uwa, ba kwa cikin duhu da zai sa ranar nan ta auko muku da mamaki kamar barawo. Dukanku 'ya'yan haske ne da 'ya'yan rana; mu ba na dare ba ne, ba kuwa na duhu ba. Saboda haka, kada mu yi barci kamar sauran mutane, sai dai mu zauna a faɗake, muna kuma a natse. Gama masu barci da dare suke barci, masu buguwa kuma da dare suke buguwa. Amma tun da mu na rana ne, bari mu kasance a natse, muna sanye da bangaskiya da ƙauna kamar sulke, begen ceto kuma kamar hula ta ƙarfe. Gama Ubanmu bai ƙaddara mu ga fushi ba, sai dai mu sami ceto ta wurin Ubangijinmu Yesu Almasihu, wanda ya mutu saboda mu, domin ko muna a faɗake ko muna barci, mu rayu tare da shi. Saboda haka ku ƙarfafa juna, ku kuma inganta juna, kamar yadda kuke yi.

Rayuwa a Matsayin 'Ya'yan Haske

Muna roƙonku, 'yan'uwa, ku girmama waɗanda suke aiki tuƙuru a cikinku, suke bi da ku cikin Ubangiji, suke kuma gyara ku. Ku ƙwarai da gaske ku ɗauke su da daraja cikin ƙauna saboda aikinsu. Ku zauna lafiya da juna.

'Yan'uwa, muna gargaɗinku, ku gyara masu ƙyuya, ku ta'azantar da waɗanda suka karaya, ku taimaki marasa ƙarfi, ku yi haƙuri da kowa. Ku lura kada kowa yă rama mugunta da mugunta ga kowa, sai dai kullum ku nemi alheri ga juna da kuma ga kowa.

Ku yi farin ciki kullum, ku yi addu'a babu fasawa, ku yi godiya cikin kome; gama wannan shi ne nufin Ubanmu dominku cikin Almasihu Yesu. Kada ku kashe Ruhu Mai Tsarki. Kada ku rena annabce-annabce, sai dai ku gwada kome; ku riƙe abin da yake nagari. Ku nisanci kowace irin mugunta.

Bari Ubanmu na salama kansa yă tsarkake ku ɗungum, bari kuma a kiyaye ruhunku da ranku da jikinku duka marar aibi a zuwan Ubangijinmu Yesu Almasihu. Mai kiranku mai aminci ne; lalle zai kuwa cika shi.

'Yan'uwa, ku yi mana addu'a.

Ku gai da dukan 'yan'uwa da sumba mai tsarki. Ina dokarku a gaban Ubangiji a karanta wannan wasiƙa ga dukan 'yan'uwa.

Alherin Ubangijinmu Yesu Almasihu yă kasance tare da ku.