1 ಥೆಸಲೋನಿಯರಿಗೆ 5 FHB Father's Heart Bible™

5 ¹ಸಹೋದರ ಸಹೋದರಿಯರೇ, ಕಾಲ ಸಮಯಗಳ ವಿಷಯವಾಗಿ ನಿಮಗೆ ಏನನ್ನೂ ಬರೆಯುವ ಅಗತ್ಯವಿಲ್ಲ. ²ನಮ್ಮ ಪ್ರಭು ಯೇಸುವಿನ ದಿನ ರಾತ್ರಿಯಲ್ಲಿ ಕಳ್ಳನು ಬರುವಂತೆ ಬರುತ್ತದೆ ಎಂಬುದು ನಿಮಗೇ ಚೆನ್ನಾಗಿ ತಿಳಿದಿದೆ. ³ಜನರು, “ಸಮಾಧಾನವೂ ಸುರಕ್ಷೆಯೂ” ಎಂದು ಹೇಳುವಾಗ, ಗರ್ಭಿಣಿಗೆ ಪ್ರಸವವೇದನೆ ಬರುವಂತೆ ಹಠಾತ್ತಾಗಿ ನಾಶನ ಅವರ ಮೇಲೆ ಬಂದೆರಗುತ್ತದೆ; ಅವರು ತಪ್ಪಿಸಿಕೊಳ್ಳಲಾರರು. ⁴ಆದರೆ ಸಹೋದರ ಸಹೋದರಿಯರೇ, ಆ ದಿನ ಕಳ್ಳನಂತೆ ನಿಮ್ಮ ಮೇಲೆ ಬಂದು ನಿಮ್ಮನ್ನು ಬೆರಗುಗೊಳಿಸುವಷ್ಟು ನೀವು ಕತ್ತಲೆಯಲ್ಲಿ ಇಲ್ಲ. ⁵ನೀವೆಲ್ಲರೂ ಬೆಳಕಿನ ಮಕ್ಕಳೂ ಹಗಲಿನ ಮಕ್ಕಳೂ ಆಗಿದ್ದೀರಿ; ನಾವು ರಾತ್ರಿಗಾಗಲೀ ಕತ್ತಲೆಗಾಗಲೀ ಸೇರಿದವರಲ್ಲ. ⁶ಆದ್ದರಿಂದ ನಾವು ಉಳಿದವರಂತೆ ನಿದ್ರಿಸದೆ, ಎಚ್ಚರವಾಗಿಯೂ ಸ್ವಸ್ಥಚಿತ್ತರಾಗಿಯೂ ಇರೋಣ. ⁷ನಿದ್ರಿಸುವವರು ರಾತ್ರಿಯಲ್ಲಿ ನಿದ್ರಿಸುತ್ತಾರೆ, ಕುಡಿದು ಮತ್ತರಾಗುವವರು ರಾತ್ರಿಯಲ್ಲಿ ಮತ್ತರಾಗುತ್ತಾರೆ. ⁸ಆದರೆ ನಾವು ಹಗಲಿಗೆ ಸೇರಿದವರಾದ್ದರಿಂದ, ವಿಶ್ವಾಸವನ್ನೂ ಪ್ರೀತಿಯನ್ನೂ ಎದೆಕವಚವಾಗಿಯೂ ರಕ್ಷಣೆಯ ನಿರೀಕ್ಷೆಯನ್ನು ಶಿರಸ್ತ್ರಾಣವಾಗಿಯೂ ಧರಿಸಿಕೊಂಡು ಸ್ವಸ್ಥಚಿತ್ತರಾಗಿರೋಣ. ⁹ಏಕೆಂದರೆ ನಮ್ಮ ತಂದೆ ನಮ್ಮನ್ನು ಕೋಪಕ್ಕಾಗಿ ಅಲ್ಲ, ನಮ್ಮ ಪ್ರಭು ಯೇಸು ಕ್ರಿಸ್ತನ ಮೂಲಕ ರಕ್ಷಣೆಯನ್ನು ಹೊಂದುವುದಕ್ಕಾಗಿಯೇ ನೇಮಿಸಿದ್ದಾರೆ. ¹⁰ನಮಗಾಗಿ ಮರಣ ಹೊಂದಿದ ಅವರು, ನಾವು ಎಚ್ಚರವಾಗಿದ್ದರೂ ನಿದ್ರಿಸುತ್ತಿದ್ದರೂ ಅವರ ಸಂಗಡವೇ ಜೀವಿಸುವಂತೆ ಹೀಗೆ ಮಾಡಿದರು. ¹¹ಆದ್ದರಿಂದ ನೀವು ಈಗ ಮಾಡುತ್ತಿರುವ ಪ್ರಕಾರವೇ, ಒಬ್ಬರನ್ನೊಬ್ಬರು ಪ್ರೋತ್ಸಾಹಿಸಿರಿ ಮತ್ತು ಒಬ್ಬರನ್ನೊಬ್ಬರು ಕಟ್ಟಿ ಬೆಳೆಸಿರಿ.

ಬೆಳಕಿನ ಮಕ್ಕಳಾಗಿ ಜೀವಿಸುವುದು

¹²ಸಹೋದರ ಸಹೋದರಿಯರೇ, ನಿಮ್ಮ ನಡುವೆ ಕಷ್ಟಪಟ್ಟು ದುಡಿಯುವ, ಪ್ರಭುವಿನಲ್ಲಿ ನಿಮ್ಮನ್ನು ನಡೆಸುವ, ನಿಮ್ಮನ್ನು ತಿದ್ದುವ ಜನರನ್ನು ಗೌರವಿಸಬೇಕೆಂದು ನಾವು ನಿಮ್ಮನ್ನು ಬೇಡಿಕೊಳ್ಳುತ್ತೇವೆ. ¹³ಅವರ ಕೆಲಸದ ನಿಮಿತ್ತ ಅವರನ್ನು ಪ್ರೀತಿಯಿಂದ ಅತ್ಯಧಿಕವಾಗಿ ಸನ್ಮಾನಿಸಿರಿ. ಒಬ್ಬರೊಂದಿಗೊಬ್ಬರು ಸಮಾಧಾನದಿಂದ ಜೀವಿಸಿರಿ.

¹⁴ಸಹೋದರ ಸಹೋದರಿಯರೇ, ನಾವು ನಿಮ್ಮನ್ನು ಒತ್ತಾಯಿಸುತ್ತೇವೆ: ಸೋಮಾರಿಗಳನ್ನು ತಿದ್ದಿರಿ, ಧೈರ್ಯಗೆಟ್ಟವರನ್ನು ಸಂತೈಸಿರಿ, ಬಲಹೀನರಿಗೆ ಆಧಾರವಾಗಿರಿ, ಎಲ್ಲರ ಕಡೆಗೆ ದೀರ್ಘಶಾಂತಿಯುಳ್ಳವರಾಗಿರಿ. ¹⁵ಯಾರೂ ಯಾರಿಗೂ ಕೆಟ್ಟದ್ದಕ್ಕೆ ಕೆಟ್ಟದ್ದನ್ನು ಮರಳಿಸದಂತೆ ನೋಡಿಕೊಳ್ಳಿರಿ; ಆದರೆ ಒಬ್ಬರಿಗೊಬ್ಬರೂ ಎಲ್ಲರಿಗೂ ಒಳ್ಳೆಯದನ್ನೇ ಯಾವಾಗಲೂ ಅನುಸರಿಸಿರಿ.

¹⁶ಯಾವಾಗಲೂ ಆನಂದಿಸಿರಿ, ¹⁷ಎಡೆಬಿಡದೆ ಪ್ರಾರ್ಥಿಸಿರಿ, ¹⁸ಎಲ್ಲದರಲ್ಲಿಯೂ ಕೃತಜ್ಞತೆಯನ್ನು ಸಲ್ಲಿಸಿರಿ; ಏಕೆಂದರೆ ಕ್ರಿಸ್ತ ಯೇಸುವಿನಲ್ಲಿ ನಿಮ್ಮ ವಿಷಯವಾಗಿ ಇದೇ ನಮ್ಮ ತಂದೆಯ ಚಿತ್ತ. ¹⁹ಪವಿತ್ರಾತ್ಮರನ್ನು ನಂದಿಸಬೇಡಿರಿ. ²⁰ಪ್ರವಾದನೆಗಳನ್ನು ತಾತ್ಸಾರ ಮಾಡಬೇಡಿರಿ, ²¹ಆದರೆ ಎಲ್ಲವನ್ನೂ ಪರೀಕ್ಷಿಸಿರಿ; ಒಳ್ಳೆಯದನ್ನು ಭದ್ರವಾಗಿ ಹಿಡಿದುಕೊಳ್ಳಿರಿ. ²²ಎಲ್ಲಾ ವಿಧವಾದ ಕೆಟ್ಟತನದಿಂದ ದೂರವಿರಿ.

²³ಸಮಾಧಾನದ ನಮ್ಮ ತಂದೆ ತಾವೇ ನಿಮ್ಮನ್ನು ಸಂಪೂರ್ಣವಾಗಿ ಪರಿಶುದ್ಧಗೊಳಿಸಲಿ; ನಮ್ಮ ಪ್ರಭು ಯೇಸು ಕ್ರಿಸ್ತನ ಬರೋಣದಲ್ಲಿ ನಿಮ್ಮ ಆತ್ಮ, ಪ್ರಾಣ ಹಾಗೂ ದೇಹ ಇವೆಲ್ಲವೂ ನಿರ್ದೋಷವಾಗಿ ಕಾಪಾಡಲ್ಪಡಲಿ. ²⁴ನಿಮ್ಮನ್ನು ಕರೆಯುವವರು ನಂಬಿಗಸ್ತರು; ಅವರು ಅದನ್ನು ಖಂಡಿತವಾಗಿ ನೆರವೇರಿಸುವರು.

²⁵ಸಹೋದರ ಸಹೋದರಿಯರೇ, ನಮಗಾಗಿ ಪ್ರಾರ್ಥಿಸಿರಿ.

²⁶ಪವಿತ್ರವಾದ ಮುದ್ದಿನಿಂದ ಎಲ್ಲಾ ಸಹೋದರ ಸಹೋದರಿಯರನ್ನು ವಂದಿಸಿರಿ. ²⁷ಈ ಪತ್ರವನ್ನು ಎಲ್ಲಾ ಸಹೋದರ ಸಹೋದರಿಯರಿಗೆ ಓದಿಹೇಳಿಸಬೇಕೆಂದು ಪ್ರಭುವಿನ ಸನ್ನಿಧಿಯಲ್ಲಿ ನಾನು ನಿಮಗೆ ಆಜ್ಞಾಪಿಸುತ್ತೇನೆ.

²⁸ನಮ್ಮ ಪ್ರಭು ಯೇಸು ಕ್ರಿಸ್ತನ ಕೃಪೆ ನಿಮ್ಮ ಸಂಗಡ ಇರಲಿ.