થેસ્સાલોનિકિઓને પહેલો પત્ર 5 FHB Father's Heart Bible™

5 ¹હવે, ભાઈઓ અને બહેનો, સમયો તથા ઋતુઓ વિશે તમને કશું લખવાની જરૂર નથી. ²રાતમાં જેમ ચોર આવે છે, તેમ આપણા પ્રભુ ઈસુનો દિવસ આવે છે, એ તમે પોતે સારી રીતે જાણો છો. ³જ્યારે લોકો કહેશે, “શાંતિ અને સલામતી,” ત્યારે જેમ ગર્ભવતી સ્ત્રીને પ્રસવવેદના આવે છે, તેમ તેમના પર એકાએક વિનાશ આવી પડશે, અને તેઓ બચી શકશે નહિ. ⁴પણ ભાઈઓ અને બહેનો, તમે અંધકારમાં નથી, કે તે દિવસ ચોરની જેમ તમને ઓચિંતો આવી પડે. ⁵તમે સૌ અજવાળાનાં બાળકો તથા દિવસનાં બાળકો છો; આપણે રાતનાં કે અંધકારનાં નથી. ⁶તો પછી, બીજાઓની જેમ આપણે ઊંઘીએ નહિ, પણ જાગતા તથા સાવધ રહીએ. ⁷કારણ, જેઓ ઊંઘે છે તેઓ રાતે ઊંઘે છે, અને જેઓ છાકટા થાય છે તેઓ રાતે છાકટા થાય છે. ⁸પણ આપણે દિવસના છીએ, માટે સાવધ રહીએ, વિશ્વાસ તથા પ્રેમરૂપી બખ્તર, અને ઉદ્ધારની આશારૂપી ટોપ પહેરીએ. ⁹કારણ, આપણા પિતાએ આપણને કોપને માટે નહિ, પણ આપણા પ્રભુ ઈસુ ખ્રિસ્ત દ્વારા ઉદ્ધાર પામવાને માટે નીમ્યા છે, ¹⁰તેમણે આપણે માટે પોતાનું મરણ સ્વીકાર્યું, કે જાગતા હોઈએ કે ઊંઘતા, આપણે તેમની સાથે જીવીએ. ¹¹તેથી, જેમ તમે કરો છો તેમ, એકબીજાને હિંમત આપો અને એકબીજાને દૃઢ કરો.

અજવાળાનાં બાળકો તરીકે જીવવું

¹²ભાઈઓ અને બહેનો, અમે તમને વિનંતી કરીએ છીએ કે જેઓ તમારામાં સખત મહેનત કરે છે, પ્રભુમાં તમને દોરે છે અને તમને સુધારે છે, તેમનો આદર કરો. ¹³તેમના કામને લીધે પ્રેમમાં તેમને ઘણા ઊંચા ગણો. એકબીજા સાથે શાંતિમાં રહો.

¹⁴ભાઈઓ અને બહેનો, અમે તમને આગ્રહ કરીએ છીએ: આળસુઓને સુધારો, નિરાશ થયેલાઓને દિલાસો આપો, નબળાઓને આધાર આપો, સૌની સાથે ધીરજ રાખો. ¹⁵ધ્યાન રાખો કે કોઈ કોઈને દુષ્ટતાને બદલે દુષ્ટતા ન વાળે, પણ એકબીજાનું તથા સૌનું ભલું કરવાને હંમેશાં મથ્યા કરો.

¹⁶સદા આનંદ કરો, ¹⁷નિરંતર પ્રાર્થના કરો, ¹⁸દરેક બાબતમાં આભાર માનો; કારણ, ખ્રિસ્ત ઈસુમાં તમારે માટે આપણા પિતાની આ ઇચ્છા છે. ¹⁹પવિત્ર આત્માને હોલવી ન નાખો. ²⁰ભવિષ્યવાણીઓને તુચ્છ ન ગણો, ²¹પણ બધી બાબતો પારખો; જે સારું છે તેને વળગી રહો. ²²દરેક પ્રકારની દુષ્ટતાથી દૂર રહો.

²³શાંતિના આપણા પિતા પોતે તમને સંપૂર્ણ રીતે પવિત્ર કરો, અને આપણા પ્રભુ ઈસુ ખ્રિસ્તના આગમન સમયે તમારો સમગ્ર આત્મા, પ્રાણ તથા શરીર નિર્દોષ રખાય. ²⁴જે તમને તેડે છે તે વિશ્વાસુ છે; તે નિશ્ચે એ પૂર્ણ કરશે.

²⁵ભાઈઓ અને બહેનો, અમારે માટે પ્રાર્થના કરો.

²⁶સર્વ ભાઈઓ અને બહેનોને પવિત્ર ચુંબનથી સલામ કરો. ²⁷હું પ્રભુની આગળ તમને આગ્રહથી કહું છું કે આ પત્ર સર્વ ભાઈઓ અને બહેનોને વાંચી સંભળાવવામાં આવે.

²⁸આપણા પ્રભુ ઈસુ ખ્રિસ્તની કૃપા તમારી સાથે હો.