2 Tasalonikawa 1 FHB Father's Heart Bible™

1 ¹Bulus, da Silbanus, da Timoti, zuwa ga ikkilisiyar Tasalonikawa wadda take cikin Ubanmu da Ubangiji Yesu Almasihu: ²Alheri gare ku da salama daga wurin Ubanmu da Ubangiji Yesu Almasihu.

Godiya saboda Karuwar Bangaskiyarku

³Ya kamata mu dinga godiya ga Ubanmu kullum saboda ku, 'yan'uwa—daidai ne haka—domin bangaskiyarku tana ƙaruwa ƙaruwa, kuma kowannenku yana ƙaruwa cikin ƙauna ga juna. ⁴Saboda haka mu kanmu muna taƙama da ku a cikin ikkilisiyoyin Ubanmu, saboda jimrinku da bangaskiyarku a cikin dukan tsanani da wahalhalun da kuke sha.

⁵Wannan shaida ce ta shari'ar Ubanmu mai adalci, cewa an lissafta ku a matsayin masu-cancanta ga Mulkin Ubanmu, wanda saboda shi kuke shan wahala. ⁶Tun da Ubanmu mai adalci ne, zai sāka wa waɗanda suke ba ku wahala da wahala, ⁷yă kuma ba ku hutu, ku da kuke shan wahala, tare da mu, sa'ad da za a bayyana Ubangiji Yesu daga Sama tare da mala'ikunsa masu-iko, ⁸cikin harshen wuta, yana hukunta waɗanda ba su san Ubanmu ba, da kuma waɗanda ba su yi biyayya ga bisharar Ubangijinmu Yesu ba. ⁹Za su sha hukuncin hallaka madawwamiya, a rabe daga gaban Ubangiji da ikonsa mai ɗaukaka, ¹⁰a ranan nan, sa'ad da ya zo domin a ɗaukaka shi cikin tsarkakansa, a kuma yi mamakinsa a cikin dukan waɗanda suka gaskata—domin an gaskata shaidarmu gare ku.

¹¹Saboda wannan muke yin addu'a dominku kullum, domin Ubanmu yă lissafta ku a matsayin masu-cancantar kiransa, yă kuma cika ta wurin ikonsa kowace sha'awar nagarta da kowane aikin bangaskiya, ¹²domin a ɗaukaka sunan Ubangijinmu Yesu a cikinku, ku kuma a cikinsa, ta wurin alherin Ubanmu da Ubangiji Yesu Almasihu.