2 Mga Tesalonica 1

1 ¹Mula kina Pablo, Silvano, at Timoteo, para sa iglesya ng mga taga-Tesalonica na nasa ating Ama at sa Panginoong Jesu-Cristo: ²Sumainyo nawa ang biyaya at kapayapaang mula sa ating Ama at sa Panginoong Jesu-Cristo.

Pasasalamat sa Inyong Lumalagong Pananampalataya

³Nararapat lamang na lagi kaming magpasalamat sa ating Ama dahil sa inyo, mga kapatid—tama lamang ito—sapagkat ang inyong pananampalataya ay patuloy na lumalago nang lumalago, at ang bawat isa sa inyo ay lalong umuunlad sa pag-ibig sa isa't isa. ⁴Kaya't kami mismo ay ipinagmamalaki kayo sa mga iglesya ng ating Ama, dahil sa inyong pagtitiyaga at pananampalataya sa gitna ng lahat ng pag-uusig at mga pagdurusang tinitiis ninyo.

⁵Ito ay katunayan ng makatarungang paghatol ng ating Ama, upang mapabilang kayo bilang karapat-dapat sa kaharian ng ating Ama, na siya ninyong pinagdurusahan. ⁶Yamang matuwid ang ating Ama, gagantihan niya ng kaguluhan ang mga gumugulo sa inyo, ⁷at bibigyan naman ng kaginhawahan kayong nagdurusa, kasama namin, kapag inihayag na mula sa langit ang Panginoong Jesus na kasama ang kanyang makapangyarihang mga anghel, ⁸sa naglalagablab na apoy, na naghahatid ng katarungan sa mga hindi nakakakilala sa ating Ama, at sa mga hindi sumusunod sa ebanghelyo ng ating Panginoong Jesus. ⁹Sila ay magbabayad ng parusang walang hanggang pagkawasak, na malayo sa harapan ng Panginoon at sa kanyang maluwalhating kapangyarihan, ¹⁰sa araw na iyon, kapag siya ay dumating upang luwalhatiin sa kanyang mga banal at hangaan sa lahat ng sumampalataya—sapagkat sinampalatayanan ang aming patotoo sa inyo.

¹¹Sa layuning ito, lagi kaming nananalangin para sa inyo, na ibilang nawa kayo ng ating Ama na karapat-dapat sa kanyang pagtawag, at tuparin sa pamamagitan ng kanyang kapangyarihan ang bawat mabuting hangarin at gawa ng pananampalataya, ¹²upang maluwalhati ang pangalan ng ating Panginoong Jesus sa inyo, at kayo naman sa kanya, sa pamamagitan ng biyaya ng ating Ama at ng Panginoong Jesu-Cristo.