2 Thessalonicanao 1

1 ¹Paul, Silvanus, kala Timothywui eina, ithumwui Avā kala Proho Jishu Khristawui alungli khalei Thessalonicawui churchli kagapina: ²Ithumwui Avā kala Proho Jishu Khristana nathumli lukhamashan kala chingri kahai miranu.

Nathumwui Shitkasang Mataisang Chiwui Vang Ningshi

³Ivānaobing, ithumna nathumwui vang atam kachida ithumwui Avāli ningshiphalungrali, hi mashunga; kaja nathumwui shitkasang chi mataisangkhangai mataisangda lei, kala nathum kachiva̱ akha eina akha leishi chi mataisangda lei. ⁴Chiwui vang eina, nathumna khāng rekakharek kala kachotkachāng saikorali nathumwui khangatar kala shitkasangwui vang, ithum khalattana ithumwui Avāwui churchbingwui ngachaili nathumwui vang lāngso.

⁵Hi ithumwui Avāwui khamashung bicharwui pramānna, chieina nathum ithumwui Avāwui wungramli kanā mi sākhavaina, chiwui vang nathumnala kachot phunga. ⁶Ithumwui Avā khamashunga sāda, nathumli kasak mibingli ana kasak tandi hanmira, ⁷kala kachot phungmi nathumli ithumli ngasoda ringkaphā mira, Proho Jishu awui pangshap khalei kazingraobing zangda kazingramli eina phongmithanghon tharan, ⁸kachuia meili, ithumwui Avāli makatheibing kala ithumwui Proho Jishuwui paokaphā kahāng mangananabingli athut khuikhavaina. ⁹Athumna Prohowui mangā kala awui tekhamatei pangshapwui eina thuida, katang makhavai kashimānwui kashong runra, ¹⁰chi zimiksholi, ana awui katharabingwui alungli tekmatei ngasak khavai, kala shitsanga mi saikorali khāngchikat khavai rāra; kaja nathumli ithumwui shākhi chi shitsanghaira.

¹¹Chiwui vang eina, ithumwui Avāna nathumli awui kahowui kanā mi sāranu, kala awui pangshap eina kaphā khavai malungkachāng saikora kala shitkasangwui otsak ungshungmiranu da, ithumna atam kachida nathumwui vang seihā sāmi. ¹²Hithada ithumwui Avā kala Proho Jishu Khristawui lukhamashan eina, ithumwui Proho Jishuwui ming chi nathumli tekmatei ngasakra, kala nathumla awuili tekmatei ngasakra.