Mbote na bantu ya Tesalonike
Mukanda ya zole yina ke kindisa dibuundu yina vwandaka na mavwilu na yina me tadila kilumbu ya Mfumu, mpe ke bokila bawu na kutelama ngolo.
1 1Ni munu Polo, Silase, mpe Timote. Beto ke fidisa mukanda yayi na dibuundu ya bantu ya Tesalonike yina kele na kati ya Tata ya beto mpe na Mfumu Yesu-Klisto: 2Bika ti Tata ya beto mpe Mfumu ya beto Yesu-Klisto kupesa beno bumbote mpe ngemba.
Matondo samu na kiminu ya beno yina ke kukula
3Beto fwana kuvutula matondo na Tata ya beto ntangu nyonso samu na beno, bampangi—yawu me fwanana mpenza—samu ti kiminu ya beno ke na kukula mingi-mingi, mpe konso muntu na kati ya beno ke na kuzola bampangi mingi-mingi. 4Ni yawu yina, beto mosi ke na kusala mayama samu na beno na kati ya mabuundu ya Tata ya beto, samu na mvibudulu mpe kiminu ya beno na kati ya minyokolo nyonso mpe bampasi yina beno ke na kuvibidila.
5Yawu kele kidimbu ya nzengolo ya kudedama ya Tata ya beto, samu ti beno me fwana na Kimfumu ya Tata ya beto, yina beno ke na kutala mpasi samu na yawu. 6Samu ti Tata ya beto kele ya kudedama, yandi ke futisa mpasi na bayina ke na kupesa beno mpasi, 7mpe yandi ke pesa kupema na beno yina ke na kutala mpasi, kintwadi na beto, ntangu Mfumu Yesu ke monikina katuka na zulu kintwadi na bambazi ya yandi ya ngolo, 8na kati ya tiya ya kulema, na kunata nzengolo na bayina kuzaba Tata ya beto ve, mpe na bayina ke tumama ve na Nsangu ya Mbote ya Mfumu ya beto Yesu. 9Bawu ke futa kitumbu ya kubeba ya seko, bawu ke vwanda ntama na ntwala ya Mfumu mpe na ngolo ya yandi ya nkembo, 10na kilumbu yina, ntangu yandi ke kwiza samu na kubaka nkembo na kati ya bantu ya yandi ya longo, mpe samu ti bantu nyonso yina kwikilaka ke yituka samu na yandi—samu ti beno kwikilaka na kimbangi ya beto.
11Samu na yawu, beto ke na kusambila beno ntangu nyonso, samu ti Tata ya beto kutanga beno bantu ya kufwana na mbokilu ya yandi, mpe na ngolo ya yandi kulungisa konso nzolani ya mbote mpe konso kisalu ya kiminu, 12samu ti Nkumbu ya Mfumu ya beto Yesu kubaka nkembo na kati ya beno, mpe beno na kati ya yandi, na lusakumunu ya Tata ya beto mpe ya Mfumu Yesu-Klisto.