2 Tesalonica 1 FHB Father's Heart Bible™

1 ¹Si Pablo, si Silvano, kag si Timoteo, sa iglesia sang mga Tesalonicanhon nga yara sa aton Amay kag sa Ginoong Jesu-Cristo: ²Ang bugay sa inyo kag ang paghidait halin sa aton Amay kag sa Ginoong Jesu-Cristo.

Nagapasalamat Tungud sa Inyo Nagadugang nga Pagtuo

³Kinahanglan nga magpasalamat kami sa gihapon sa aton Amay tungud sa inyo, mga kauturan—kag nagakaigo ini—kay nagadugang sing labi pa gid ang inyo pagtuo, kag nagadugang man ang gugma sang kada isa sa inyo sa isa kag isa. ⁴Gani nagapabugal kami mismo tungud sa inyo sa mga iglesia sang aton Amay, tungud sang inyo pagpailub kag pagtuo sa tanan nga mga paghingabot kag mga kapipit-an nga inyo ginaantus.

⁵Pamatuud ini sang matarung nga paghukom sang aton Amay, nga ginaisip kamo nga takus sa ginharian sang aton Amay, nga tungud sini nagaantus man kamo. ⁶Sanglit matarung ang aton Amay, balusan niya sing kapipit-an ang mga nagapipit sa inyo, ⁷kag hatagan sing kapahuwayan kamo nga nagaantus, upod sa amon, sa tion nga ipahayag ang Ginoong Jesus halin sa langit upod sa iya gamhanan nga mga anghel, ⁸sa nagadabdab nga kalayo, nga nagadala sing katarungan sa mga wala makakilala sa aton Amay, kag sa mga indi nagatuman sang maayong balita sang aton Ginoong Jesus. ⁹Pagabayaran nila ang silot sang kalaglagan nga walay katapusan, nga malayo sa atubangan sang Ginoo kag sa iya mahimayaon nga gahum, ¹⁰sa amo nga adlaw, sa tion nga magkari sia agud himayaon sa iya mga balaan kag dayawon sa tunga sang tanan nga nagtuo—kay gintuohan ang amon pagpamatuud sa inyo.

¹¹Tungud sini nagapangamuyo kami sa gihapon tungud sa inyo, nga isipon kamo sang aton Amay nga takus sa iya pagtawag, kag tumanon niya paagi sa iya gahum ang tagsa ka handum sa kaayohan kag ang buluhaton sang pagtuo, ¹²agud mahimaya ang ngalan sang aton Ginoong Jesus sa inyo, kag kamo sa iya, paagi sa bugay sang aton Amay kag sang Ginoong Jesu-Cristo.