Thessalonia miko kelü süo
Niepoo tüce celü krokrü keta kehuce metü meco sü, mu uko tha metü bate zisü cü süo lesi künao zo.
1 1Paul, Silvanus, mu Timothy — ha Po mu Niepoo Jisu Khrista lü kebao Thessalonia mi kehuce: 2Ngokemezhe mu thelü kemenü ha Po mu Niepoo Jisu Khrista celü neko yo ba yite.
Neko Kemelü Ve Kühüo La Mezathi
3Sazüjürako, hako neko yo pütü metülü ha Po meza thiku ti mesüzo, süsü potü süzo; kekrelamori neko kemelü ve kühü ma kühü thi, mu neko mipüpü luni yo kükhrüo kha ve kühü thizo. 4Süla hako utho ha Po kehuko dolü, neko müthi müni mu kemezhe metülü thitayo neko sügüsühe mu kemelü la, neko yo kümühazo.
5Hihi ha Po sheco kemezilü yo zasi zo, neko ha Po kederevü yo thi sü mi le poyi, süo la neko kha kemezhe kesüzo. 6Kekrelamori ha Po sheco kemezipü zo, neko kebü ketimiko yo Pü kebü khüpo thito, 7mu neko kemezhe kesüko yo hako mu kha reli tsüyi; Niepoo Jisu Pü keku tüyo choyiko züde tüyolüno mesemengo süce, 8me kümüre küti lü, ha Po se mamiko yo, mu ha Niepoo Jisu jüyikeve jüzü thi mamiko yo kemezi khüpo thito. 9Uko Niepoo presa mu Pü zapozale keku celü khava die, kechothe kemeka kejo ngoyito, 10süti tüce, Pü kemesako lü zapozale thi süyi, mu melü keyimi metü dolü ngophi süyi kevorito; kekrelamori hako neko ce zhopo thi kesüo neko melüyi ta.
11Süo la hako neko yo pütü metülü kecho thiba; ha Po neko Pü cükeyi yo thi sümi le poyi te, mu Pü keku na mhakeve münyü metü mu kemelü mhatho metü thitso süte, 12Süla ha Po mu Niepoo Jisu Khrista ngokemezhe na, ha Niepoo Jisu za neko lü zapozale thi süyi, mu neko Pü lü zapozale thi süto.
