2 Batesalonika 1 FHB Father's Heart Bible™

1 ¹Polo, Silwano mpe Timote, epai ya lingomba ya Ba-Tesaloniki oyo ezali kati na Tata na biso mpe Nkolo Yesu-Klisto : ²Ngolu mpe kimia euti na Tata na biso mpe Nkolo Yesu-Klisto ezala na bino.

Botondi mpo na kondima na bino oyo ezali kokola

³Tosengeli kopesa Tata na biso matondi mpo na bino ntango nyonso, bandeko, mpe ezali malamu, pamba te kondima na bino ezali kokola mingi mpe mingi, mpe moko na moko na bino azali kolinga mingi bandeko na ye. ⁴Boye biso moko tozali komikumisa mpo na bino kati na mangomba ya Tata na biso, mpo na molende mpe kondima na bino kati na minyoko mpe pasi nyonso oyo bozali konyokwama na yango.

⁵Oyo ezali elembo ya bosambisi ya sembo ya Tata na biso, ete bozwami na ntina ya Bokonzi ya Tata na biso, oyo bozali mpe konyokwama mpo na yango. ⁶Mpo ete Tata na biso azali sembo, Ye akozongisela pasi bato oyo bazali kopesa bino pasi, ⁷mpe akopesa bino oyo bozali konyokwama, elongo na biso, kopema, tango Nkolo Yesu akomonisama longwa na likolo elongo na baanzelu na Ye ya nguya, ⁸kati na moto ya kopela, kopesa etumbu na bato oyo bayebi Tata na biso te, mpe na bato oyo bazali kotosa Nsango Malamu ya Nkolo na biso Yesu te. ⁹Bakozwa etumbu ya libungisi ya seko, mosika na bozali ya Nkolo mpe na nguya na Ye ya nkembo, ¹⁰na mokolo wana, tango akoya mpo ete atombolama na nkembo kati na basantu na Ye mpe bato nyonso oyo bandimaki bakamwa Ye, pamba te litatoli na biso epai na bino endimamaki.

¹¹Mpo na likambo oyo tozali kobondela mpo na bino ntango nyonso, tika ete Tata na biso atanga bino ete bozali na ntina ya libiangi na Ye, mpe akokisa na nguya na Ye posa nyonso ya malamu mpe misala nyonso ya kondima, ¹²mpo ete kombo ya Nkolo na biso Yesu etombolama na nkembo kati na bino, mpe bino kati na Ye, na ngolu ya Tata na biso mpe Nkolo Yesu-Klisto.