تسالونئکی‌لره سالام
ربّئن گونو باره‌ده چاشمیش بئر کئلئسانی ثابئتلندئرن و اونلاری ثابئت دورماغا چاغیران، داوام ادن بئر مکتوب.
1 1پولوس، سئلوانوس و تئموتاعوسدان، آتامیز و رب عئسا مسئحده اولان تسالونئکی‌لرئن کئلئساسینا: 2سئزه آتامیزدان و رب عئسا مسئحدن فیض و باریش اولسون.
آرتان ائمانینیزا گؤره شوکور
3قارداشلار، بئز همئشه سئزئن اوچون آتامیزا شوکور اتمه‌لی‌یئک، نجه کی لایئقدئر، چونکی ائمانینیز گئتدئکجه داها دا آرتیر و هر بئرئنئزئن بئربئرئنئزه اولان محبّتی ده آرتیر. 4بله‌جه بئز اؤزوموز، چکدئیئنئز بوتون تعقئب و عذابلاردا اولان صبر و ائمانینیز اوچون، آتامیزین کئلئسالاری آراسیندا سئزئن حاقّینیزدا فخر ادئرئک.
5بو، آتامیزین عادئل حؤکمونو ثوبوت ادئر، یعنی سئز آتامیزین پادشاهلیغینا لایئق ساییلیرسینیز کی، اونون اوچون عذاب دا چکئرسئنئز. 6آتامیز عادئل اولدوغونا گؤره، سئزی ائنجئدنلره عوضئنده عذاب وره‌جک، 7و عذاب چکن سئزلره، بئزئمله بئرلئکده، راحاتلیق وره‌جک؛ او واخت کی، رب عئسا اؤز قووّتلی ملکلری ائله گؤیدن ظاهئر اولا، 8آلوولانان اودون ائچئنده، آتامیزی تانیمایانلارین و ربّئمئز عئسانین ائنجئلئنه ائطاعت اتمه‌ینلرئن اوستونه عدالت گتئره‌رَک. 9اونلار ابدی هلاکت جزاسینی چکه‌جکلر، ربّئن حوضوروندان و اونون شؤوکتلی قووّتئندن اوزاق، 10او گون کی، او، اؤز موقدّسلری آراسیندا عئزّتلنمک و ائمان گتئرنلرئن هامیسی طرفئندن حیرانلیقلا قارشیلانماق اوچون گله‌جک؛ چونکی سئز بئزئم شهادتئمئزه ائناندینیز.
11بونون اوچون بئز همئشه سئزئن اوچون دوعا ادئرئک کی، آتامیز سئزی اؤز دعوتئنه لایئق ساییب، اؤز قووّتی ائله یاخشیلیغا اولان هر آرزو و ائمان ائشی یرئنه یتئشسئن، 12بله‌جه آتامیزین و رب عئسا مسئحئن فیضی ائله، ربّئمئز عئسانین آدی سئزده و سئز ده اوندا عئزّتلنه‌سئنئز.
