୨ ଥେସଲନୀକୀୟ 1 FHB Father's Heart Bible™

1 ¹ପାଉଲ, ସିଲ୍ଵାନ ଓ ତୀମଥି, ଆମ୍ଭମାନଙ୍କ ପିତା ଓ ପ୍ରଭୁ ଯୀଶୁ ଖ୍ରୀଷ୍ଟଙ୍କଠାରେ ସ୍ଥିତ ଥେସଲନୀକୀୟମାନଙ୍କ ମଣ୍ଡଳୀ ନିକଟକୁ: ²ଆମ୍ଭମାନଙ୍କ ପିତା ଓ ପ୍ରଭୁ ଯୀଶୁ ଖ୍ରୀଷ୍ଟଙ୍କଠାରୁ ତୁମ୍ଭମାନଙ୍କ ପ୍ରତି ଅନୁଗ୍ରହ ଓ ଶାନ୍ତି ହେଉ।

ତୁମ୍ଭମାନଙ୍କ ବୃଦ୍ଧିଶୀଳ ବିଶ୍ଵାସ ନିମନ୍ତେ ଧନ୍ୟବାଦ

³ହେ ଭାଇ ଓ ଭଉଣୀମାନେ, ତୁମ୍ଭମାନଙ୍କ ନିମନ୍ତେ ଆମ୍ଭେମାନେ ସର୍ବଦା ଆମ୍ଭମାନଙ୍କ ପିତାଙ୍କୁ ଧନ୍ୟବାଦ ଦେବା ଆମ୍ଭମାନଙ୍କ ଅବଶ୍ୟ କର୍ତ୍ତବ୍ୟ—ଆଉ ଏହା ଯଥାର୍ଥ—କାରଣ ତୁମ୍ଭମାନଙ୍କ ବିଶ୍ଵାସ ଉତ୍ତରୋତ୍ତର ବୃଦ୍ଧି ପାଉଅଛି, ଆଉ ପରସ୍ପର ପ୍ରତି ତୁମ୍ଭ ପ୍ରତ୍ୟେକଙ୍କ ପ୍ରେମ ଅଧିକରୁ ଅଧିକ ବଢ଼ୁଅଛି। ⁴ଏଣୁ ତୁମ୍ଭେମାନେ ଯେଉଁ ସମସ୍ତ ତାଡ଼ନା ଓ କ୍ଲେଶ ସହୁଅଛ, ସେଥିରେ ତୁମ୍ଭମାନଙ୍କ ଧୈର୍ଯ୍ୟ ଓ ବିଶ୍ଵାସ ନିମନ୍ତେ ଆମ୍ଭେମାନେ ନିଜେ ଆମ୍ଭମାନଙ୍କ ପିତାଙ୍କ ମଣ୍ଡଳୀସମୂହ ମଧ୍ୟରେ ତୁମ୍ଭମାନଙ୍କ ବିଷୟରେ ଦର୍ପ କରୁଅଛୁ।

⁵ଏହା ଆମ୍ଭମାନଙ୍କ ପିତାଙ୍କ ନ୍ୟାୟସଙ୍ଗତ ବିଚାରର ପ୍ରମାଣ, ଯେପରି ତୁମ୍ଭେମାନେ ଆମ୍ଭମାନଙ୍କ ପିତାଙ୍କ ରାଜ୍ୟ ନିମନ୍ତେ ଯୋଗ୍ୟ ବୋଲି ଗଣିତ ହୁଅ, ଯାହା ନିମନ୍ତେ ତୁମ୍ଭେମାନେ ମଧ୍ୟ କ୍ଲେଶ ଭୋଗ କରୁଅଛ। ⁶କାରଣ ଆମ୍ଭମାନଙ୍କ ପିତା ନ୍ୟାୟବାନ୍ ଅଟନ୍ତି, ଯେଉଁମାନେ ତୁମ୍ଭମାନଙ୍କୁ କ୍ଲେଶ ଦିଅନ୍ତି, ସେମାନଙ୍କୁ ସେ କ୍ଲେଶ ପ୍ରତିଦାନ କରିବେ, ⁷ଆଉ ଯେତେବେଳେ ପ୍ରଭୁ ଯୀଶୁ ଆପଣା ପରାକ୍ରମୀ ଦୂତଗଣଙ୍କ ସହିତ ସ୍ଵର୍ଗରୁ ପ୍ରକାଶିତ ହେବେ, ସେତେବେଳେ କ୍ଲେଶଭୋଗୀ ତୁମ୍ଭମାନଙ୍କୁ ଆମ୍ଭମାନଙ୍କ ସହିତ ବିଶ୍ରାମ ଦେବେ, ⁸ଯେଉଁମାନେ ଆମ୍ଭମାନଙ୍କ ପିତାଙ୍କୁ ଜାଣନ୍ତି ନାହିଁ ଓ ଆମ୍ଭମାନଙ୍କ ପ୍ରଭୁ ଯୀଶୁଙ୍କ ସୁସମାଚାର ମାନନ୍ତି ନାହିଁ, ସେମାନଙ୍କ ଉପରେ ସେ ପ୍ରଜ୍ଵଳିତ ଅଗ୍ନିରେ ନ୍ୟାୟଦଣ୍ଡ ଆଣିବେ। ⁹ସେମାନେ ପ୍ରଭୁଙ୍କ ଉପସ୍ଥିତି ଓ ତାହାଙ୍କ ମହିମାମୟ ପରାକ୍ରମଠାରୁ ଦୂରୀକୃତ ହୋଇ ଅନନ୍ତ ବିନାଶରୂପ ଦଣ୍ଡ ଭୋଗ କରିବେ, ¹⁰ସେହି ଦିନ ଯେତେବେଳେ ସେ ଆପଣା ପବିତ୍ର ଲୋକମାନଙ୍କଠାରେ ମହିମାନ୍ଵିତ ହେବା ପାଇଁ ଓ ବିଶ୍ଵାସକାରୀ ସମସ୍ତଙ୍କ ମଧ୍ୟରେ ପ୍ରଶଂସିତ ହେବା ପାଇଁ ଆଗମନ କରିବେ—କାରଣ ତୁମ୍ଭମାନଙ୍କ ପ୍ରତି ଆମ୍ଭମାନଙ୍କ ସାକ୍ଷ୍ୟ ବିଶ୍ଵାସ କରାଯାଇଥିଲା।

¹¹ଏହି ଉଦ୍ଦେଶ୍ୟରେ ଆମ୍ଭେମାନେ ସର୍ବଦା ତୁମ୍ଭମାନଙ୍କ ନିମନ୍ତେ ପ୍ରାର୍ଥନା କରୁଅଛୁ, ଯେପରି ଆମ୍ଭମାନଙ୍କ ପିତା ତୁମ୍ଭମାନଙ୍କୁ ଆପଣା ଆହ୍ଵାନର ଯୋଗ୍ୟ ବୋଲି ଗଣନା କରନ୍ତି, ଆଉ ମଙ୍ଗଳ ନିମନ୍ତେ ପ୍ରତ୍ୟେକ ବାସନା ଓ ବିଶ୍ଵାସର କାର୍ଯ୍ୟ ଆପଣା ଶକ୍ତିରେ ସଫଳ କରନ୍ତି, ¹²ଯେପରି ଆମ୍ଭମାନଙ୍କ ପିତା ଓ ପ୍ରଭୁ ଯୀଶୁ ଖ୍ରୀଷ୍ଟଙ୍କ ଅନୁଗ୍ରହ ଦ୍ଵାରା ତୁମ୍ଭମାନଙ୍କଠାରେ ଆମ୍ଭମାନଙ୍କ ପ୍ରଭୁ ଯୀଶୁଙ୍କ ନାମ ମହିମାନ୍ଵିତ ହୁଏ, ଆଉ ତାହାଙ୍କଠାରେ ତୁମ୍ଭେମାନେ ମଧ୍ୟ ମହିମାନ୍ଵିତ ହୁଅ।