2 Tẹsalonika 1

1 ¹Paulu, Silfanu, àti Timoteu, sí ìjọ àwọn ará Tẹsalonika tí ó wà nínú Baba wa àti Olúwa Jesu Kristi: ²Oore-ọ̀fẹ́ àti àlàáfíà sí yín láti ọ̀dọ̀ Baba wa àti Olúwa Jesu Kristi.

Ọpẹ́ fún Ìgbàgbọ́ yín tí ń dàgbà

³Ẹ̀yin ará, a gbọdọ̀ máa dúpẹ́ lọ́wọ́ Baba wa nígbà gbogbo nítorí yín—ó sì tọ́ bẹ́ẹ̀—nítorí ìgbàgbọ́ yín ń dàgbà sí i, àti pé olúkúlùkù yín ń pọ̀ sí i nínú ìfẹ́ sí ara yín. ⁴Nítorí náà, àwa fúnra wa ń ṣògo nípa yín láàrín àwọn ìjọ Baba wa, nítorí ìforítì àti ìgbàgbọ́ yín nínú gbogbo inúnibíni àti ìjìyà tí ẹ̀ ń faradà.

⁵Èyí ni ẹ̀rí ìdájọ́ òdodo Baba wa, pé a kà yín yẹ fún ìjọba Baba wa, èyí tí ẹ̀ ń jìyà nítorí rẹ̀ pẹ̀lú. ⁶Níwọ̀n bí Baba wa ti jẹ́ olódodo, yóò san ìyọnu padà fún àwọn tí ń yọ yín lẹ́nu, ⁷yóò sì fún yín tí ẹ̀ ń jìyà ní ìtura, pẹ̀lú àwa, nígbà tí a bá fi Olúwa Jesu hàn láti ọ̀run wá pẹ̀lú àwọn angẹli alágbára rẹ̀, ⁸nínú iná tí ń jó, tí yóò mú ìdájọ́ wá sórí àwọn tí kò mọ Baba wa, àti sórí àwọn tí kò gbọ́ ìhìnrere Olúwa wa Jesu. ⁹Wọn yóò jẹ ìyà ìparun àìnípẹ̀kun, kúrò níwájú Olúwa àti kúrò nínú ògo agbára rẹ̀, ¹⁰ní ọjọ́ náà, nígbà tí ó bá dé láti gba ògo nínú àwọn ẹni mímọ́ rẹ̀, àti láti jẹ́ ẹni ìyìn láàrín gbogbo àwọn tí ó gbàgbọ́—nítorí a gba ẹ̀rí wa sí yín gbọ́.

¹¹Nítorí èyí ni a fi ń gbàdúrà fún yín nígbà gbogbo, pé kí Baba wa kà yín yẹ fún ìpè rẹ̀, àti kí ó fi agbára rẹ̀ mú gbogbo ìfẹ́ fún rere àti iṣẹ́ ìgbàgbọ́ ṣẹ, ¹²kí a lè yin orúkọ Olúwa wa Jesu lógo nínú yín, àti ẹ̀yin nínú rẹ̀, nípa oore-ọ̀fẹ́ Baba wa àti Olúwa Jesu Kristi.