Tesalonika nunger dang salem o
Kibuba Yimli indang süngmanga aliba arogo tali akümdaktsü, aser tali aliang ta jarba, tanabuba shiti ka lir.
1 1Paul, Silvanus aser Timoti nungi, asen Tebu aser Kibuba Yisu Khrista nung aliba Tesalonika nunger arogo dangi; 2Asen Tebu aser Kibuba Yisu Khrista nungi taochi aser tesünep nenok dang sang.
Nenok tamang taliba asoshi tenüng asang
3Adianutem, nenok asoshi asenoki Tebu tenüng teti asangtsü tim, iba shitak lir, kechiaser nenok tamang kanga tali tali aküm, aser nenok nisung shiai kati ka dang temeim nung tali aküm. 4Anungji asenoki pei sasa Tebu arogotem rongnung nenok asoshi tejak tenteta ulur, kechiaser nenoki rishikangshi aser timtem ajak nung aremzüka abendang, nenok aremzüka aser tamangji.
5Ibaji Tebu ochi obendang kuli lir, anungji nenok Tebu Yimli asoshi tetemsü ta mezüngdangtsü, koba Yimli asoshi nenoka timtemba lir. 6Kechiaser Tebu ochishir lir, pai nenok dang timtem agütsür parnok nem timtem renshia jangzüktsü, 7aser kodang Kibuba Yisu pei tashi tulu tenyartem den kotak nungi jungkai adokdir, timtemba nenok nem onok den allu agütsütsü, 8mi jangruba nung, Tebu memetetba parnok dang, aser asen Kibuba Yisu Osangtajung mangaba parnok dang mangyangba agütsütsü. 9Parnoki Kibuba tsüngdang aser pei sentsüwangshi ain nungi pila-a, teti taküm teraksa temerenshiji agütsütsü, 10aji anogo nung, pei temeshipur dak sentsüwangshitsü aser tamanger ajak rongnung tesüngmangtsü asoshi pa arudir, kechiaser nenok dang onok kuliji amang.
11Iba asoshi, Tebui pa ajaba asoshi nenok tetemsü ta mezüngdangtsü, aser tajung aginür ajak aser tamang tasen ajakji pa ain nung atalokdaktsü asoshi, asenoki nenok asoshi teti sarasademer. 12anungji asen Tebu aser Kibuba Yisu Khrista taochi ajanga, asen Kibuba Yisu tenüng nenok dak sentsüwangshitsü, aser nenok pa dak sentsüwangshitsü.