Kagateet ne po piigap Thesalonika
Parweet ne po aeng' ne gimitei kaniset ne kagokwong'yo agobo peetuutap Kiptaiyat, ak kuurei icheek kotonon kogimit.
1 1Paulo, ak Silvano, ak Timoteo, kisirchini kanisetap piigap Thesalonika ne mi Kwandanyo ak Kiptaiyat Jeso Kristo: 2Ingotep kobootok myeeindo ak kaalyeet ne punu Kwandanyo ak Kiptaiyat Jeso Kristo.
Kongoi agobo kayaneng'wong' ne eetei
3Kinyolu kemwachi Kwandanyo kongoi peetuusyek tugul agobo okweek, che kitupche, ko uu ye nyolu, amu testai koeet kayaneng'wong', ak testai chamyet ne otinye age ak age eng' okweek tugul. 4Nooto anyun iloskei acheegei agobo okweek among kanisosyek che po Kwandanyo, agobo muitaet ak kayaneng'wong' eng' tuguuk tugul che usook ak nyalilwogik che omuitoi.
5Ni paornateet ne po kirwoogetap Kwandanyo ne po imanda, ale koit okweek onyolu laitornatetap Kwandanyo, ne onyalili agine agobo nooto. 6Amu imanda Kwandanyo, repaik nyalilda icheek che yaei okweek nyalilda, 7ak kogoonok kagaigaet okweek che onyalili, kobooto acheek, ye king'ang'ei Kiptaiyat Jeso eng' kipsengwet kobooto angeennyi che kiimeen, 8eng' maat ne lalei, koip kirwooget icheek che ma ngen Kwandanyo, ak icheek che ma epchini iit logoiywek che myach che po Kiptaiyandennyo Jeso. 9Koyachi icheek melekto ne po ng'emisyet ne po koigeny, ko loo eng' ole mi Kiptaiyat ak eng' kimnateennyi ne po kalasunet, 10eng' peetuunooto, ye nyonei si kegonyit eng' che tiliileen chechuuk ak koloskei among tugul che ki iyan—amu ki iyan paornatennyo eng' okweek.
11Agobo nooto kisaae agobo okweek kotugul, ale koit Kwandanyo onyolu kuureennyi, ak kosulda eng' kimnateennyi mageet tugul ne po myee ak poisyetap kayaneet, 12si kegonyit kainetap Kiptaiyandennyo Jeso eng' okweek, ak okweek eng' ineendet, eng' myeeindap Kwandanyo ak Kiptaiyat Jeso Kristo.